လုပ်ငန်းခွင်အတွင်း ဝန်ဆောင်မှုယဉ်ကျေးမှုပုံစံတစ်ခုကို ဖော်ဆောင်ဖို့အတွက် နည်းလမ်းများ
ယနေ့ခေတ်ရဲ့ ပြိုင်ဆိုင်မှု ပြင်းထန်တဲ့ စီးပွားရေးနယ်ပယ်မှာ လုပ်ငန်းအဖွဲ့အစည်းများဟာ လုပ်ငန်းခွင်အတွင်း ခိုင်မာတဲ့ ဝန်ဆောင်မှုယဉ်ကျေးမှုတစ်ခုကို ပြုစုပျိုးထောင်ခြင်းရဲ့ အရေးပါမှုကို အသိအမှတ်ပြုလာနေကြပါတယ်။ ဝန်ဆောင်မှုယဉ်ကျေးမှုတစ်ခုဟာ ဖောက်သည်ဝန်ဆောင်မှုပေးရာမှာ ကောင်းမွန်ခြင်းကို ထောက်ပံ့ပေးနိုင်တာထက် ပိုပါတယ်။ လုပ်ငန်းရဲ့ အဆင့်တိုင်းမှာ ထူးခြားကောင်းမွန် လွန်းတဲ့ ဝန်ဆောင်မှုကိုပေးနိုင်ဖို့ ဦးထိပ်ပန်ထားတဲ့ အဖွဲ့အစည်းဆိုင်ရာ ဘုံသဘောထားများနဲ့ ဘုံတန်ဖိုးများကို လွှမ်းခြုံထားပါတယ်။ ဒီဆောင်းပါးမှာ အဖွဲ့အစည်းများဟာ ဝန်ထမ်းများနဲ့ ထိတွေ့ဆက်ဆံမှုကောင်းမွန်ရေး၊ ဖောက်သည်စိတ်ကျေနပ်မှုရရှိရေးနဲ့ လုပ်ငန်းရေရှည်အောင်မြင်ရေးတို့ကို မြှင့်တင်ပေးတဲ့ ဝန်ဆောင်မှု ယဉ်ကျေးမှုတစ်ရပ်ကို လုပ်ငန်းတွင်းဖြစ်ပေါ်လာအောင် ကူညီပေးနိုင်မယ့် ထိရောက်တဲ့ ဗျူဟာများနဲ့ လက်တွေ့ကျတဲ့ နည်းလမ်းတွေကို ရှာဖွေတင်ပြသွားပါမယ်။
လုပ်ငန်းရဲ့ ပင်မရင်းမြစ် လက်ခံတန်ဖိုးထားတဲ့ အရာတွေကို သတ်မှတ်ပြီး ဆက်သွယ်ဖြန့်ဝေပါ။
ဝန်ဆောင်မှုယဉ်ကျေးမှုတစ်ခု ဖွံ့ဖြိုးတိုးတက်စေဖို့ ဖောက်သည်ဗဟိုပြုချဉ်းကပ်မှုနဲ့ လိုက်လျော ညီထွေဖြစ်စေတဲ့ အဓိကလက်ခံတန်ဖိုးတွေကို လုပ်ငန်းတွင်း သတ်မှတ်ပြောဆိုဆက်သွယ်ဖို့ လိုအပ်ပါတယ်။ ဝန်ဆောင်မှု ထူးချွန်ကောင်းမွန်ဖို့အတွက် အဖွဲ့အစည်းရဲ့ မစ်ရှင်၊ အမြင်နဲ့ တန်ဖိုးတွေကို ရှင်းလင်းစွာ ထုတ်ဖော်ပါ။ ဝန်ထမ်းတွေဟာ ဒီတန်ဖိုးတွေကို လက်ခံယုံကြည်ပြီး ဒါတွေကို နေ့စဉ်လုပ်ငန်းဆောင်တာများနဲ့ ဆုံးဖြတ်ချက်ချတဲ့ လုပ်ငန်းစဉ်တွေမှာ ပေါင်းစည်းထားကြောင်း သေချာနေပါစေ။ ဒါမှ သတ်မှတ်ထားတဲ့ ဝန်ဆောင်မှု စံနှုန်းတွေက မိမိလုပ်ငန်းက သွေဖယ်မသွားမှာ ဖြစ်ပါတယ်။
ဥပမာများနဲ့ ဦးဆောင်ပါ။
ဝန်ဆောင်မှုကို ဦးတည်တဲ့ လုပ်ငန်းခွင်တစ်ခု ဖန်တီးခြင်းက လုပ်ငန်းတွင်း ဦးဆောင်နေသူများရဲ့ ခေါင်းဆောင်မှုနဲ့ စတင်ပါတယ်။ ခေါင်းဆောင်တွေဟာ မိမိတို့ရဲ့ အဖွဲ့များအတွင်း လိုချင်တဲ့ ဝန်ဆောင်မှု ယဉ်ကျေးမှုပုံစံတစ်ခုကို ဖော်ညွှန်းအကောင်အထည်ဖော်ရပါမယ်။ သူတို့ အလိုရှိတဲ့ လုပ်ငန်းတွင်း အပြုအမူတွေကို တစ်စိုက်မတ်မတ် ကိုယ်တိုင်ဦးဆောင်သရုပ်ပြခြင်းနဲ့ ဝန်ဆောင်မှုပေးတဲ့နေရာတွေမှာ အားဖြည့်ပါဝင်ခြင်းဖြင့် ခေါင်းဆောင်များဟာ အဖွဲ့အစည်း တစ်ခုလုံးအတွက် စံပုံစံကို သတ်မှတ်ပေးပါတယ်။ ခေါင်းဆောင်များဟာ ထူးခြားကောင်းမွန်တဲ့ ဝန်ဆောင်မှုပေးနိုင်ဖို့ အမြဲဦးစားပေးနေတဲ့အခါ ဝန်ထမ်းများဟာ အဲဒီပုံစံ ယဉ်ကျေးမှုအတိုင်း လိုက်လျောညီထွေဖြစ်ဖို့ အလားအလာပိုများပါတယ်။
ဝန်ထမ်းများ လေ့ကျင့်ရေနဲ့ ဖွံ့ဖြိုးတိုးတက်ရေးမှာ ရင်းနှီးမြှုပ်နှံပါ။
ထူးချွန်ထက်မြက်တဲ့ ဝန်ဆောင်မှုကို ပေးဆောင်ဖို့အတွက် ဝန်ထမ်းတွေကို လိုအပ်တဲ့ ကျွမ်းကျင်မှုနဲ့ အသိပညာများ ဖြည့်ဆည်းပေးနေရပါမယ်။ ဖောက်သည်ဝန်ဆောင်မှုနည်းပညာများ၊ ဆက်သွယ်ရေး ကျွမ်းကျင်မှု၊ ဖောက်သည်ပြဿနာဖြေရှင်းခြင်းနဲ့ ဖောက်သည်များအပေါ် စာနာမှုတို့ကို အာရုံစိုက်တဲ့ ပြည့်စုံတဲ့ လေ့ကျင့်သင်ကြားရေးအစီအစဉ်တွေကို ဖော်ဆောင်ပေးပါ။ စဉ်ဆက်မပြတ် ဖွံ့ဖြိုးတိုးတက်ရေး အခွင့်အလမ်းတွေဟာ ဝန်ထမ်းတွေရဲ့ စွမ်းဆောင်ရည်ကို မြှင့်တင်ပေးရုံသာမက ဝန်ဆောင်မှု ထူးချွန်မှုရဲ့ အရေးပါမှုကိုလည်း အားဖြည့်ပေးရာရောက်ပါတယ်။
လုပ်ငန်းတွင်းဝန်ထမ်းများနဲ့ ထိတွေ့ဆက်ဆံမှု ကောင်းမွန်အောင်လုပ်ပါ။
ထိတွေ့ဆက်ဆံမှု ကောင်းတဲ့ ဝန်ထမ်းများဟာ လုပ်ငန်းအတွက် ထူးခြားပြည့်စုံတဲ့ ဝန်ဆောင်မှုကို ပေးဆောင်နိုင်ဖို့ အလားအလာ ပိုများပါတယ်။ အဖွဲ့လိုက်လုပ်ဆောင်မှု၊ ပွင့်လင်းစွာပြောဆိုဆက်ဆံမှုနဲ့ ဝန်ထမ်းများရဲ့ စွမ်းဆောင်ရည်ကို မြှင့်တင်ပေးတဲ့ အပြုသဘော ဆောင်တဲ့ အလုပ်ပတ်ဝန်းကျင်ကို မွေးမြူ ထူထောင်ပါ။ ထူးခြားပြည့်စုံတဲ့ ဝန်ဆောင်မှုတွေကို အမြဲတစေ ထမ်းဆောင်နေတဲ့ ဝန်ထမ်းတွေကို အသိအမှတ်ပြု ဂုဏ်ယူကာ လုပ်ငန်းခွင်အတွင်း သူတို့ရဲ့ စိတ်အားထက်သန်မှုကို မြှင့်တင်ပေးပါ။
ဖောက်သည်တုံ့ပြန်ချက်များ စုဆောင်းပြီး တိုးတက်အောင်လုပ်ဆောင်ပါ။
လုပ်ငန်းရဲ့ ဝန်ဆောင်မှုတိုးတက်မှုအတွက် ဖောက်သည်တွေရဲ့ လိုအပ်ချက်များ၊ မျှော်လင့်ချက်များနဲ့ ပိုမိုကောင်းမွန်အောင် လုပ်ဆောင်ပေးရမယ့် နယ်ပယ်တွေကို နားလည်ဖို့ ဖောက်သည်တွေရဲ့ တုံ့ပြန်မှုကို တက်တက်ကြွကြွ ရှာဖွေပါ။ လေ့လာမှုစစ်တမ်းများ၊ ဆိုရှယ်မီဒီယာမှ တုံ့ပြန်ချက်များစောင့်ကြည့်ခြင်းနဲ့ ဖောက်သည်ဝန်ဆောင်မှု အပြန်အလှန်တုံ့ပြန်မှုတွေလို အမျိုးမျိုးသော တုံ့ပြန်ချက်လမ်းကြောင်းတွေကို အသုံးပြုပြီး တန်ဖိုးရှိတဲ့ ဖောက်သည် အချက်အလက်တွေကို စုဆောင်းပါ။ တုံ့ပြန်ချက်တွေကို ပိုင်းခြားစိတ်ဖြာပြီး ဖောက်သည်တွေရဲ့ စိုးရိမ်ပူပန်မှုတွေကို ကိုင်တွယ်ဖြေရှင်းဖို့နဲ့ ဖောက်သည် အတွေ့အကြုံကို မြှင့်တင်ဖို့ သင့်လျော်တဲ့ လုပ်ဆောင်ချက်တွေကို မဆိုင်းမတွ ချက်ချင်းလုပ်ဆောင်ပေးပါ။
ပူးပေါင်းဆောင်ရွက်ခြင်းနဲ့ အသိပညာမျှဝေခြင်းကို အားပေးပါ။
ဝန်ဆောင်မှုယဉ်ကျေးမှုပုံစံတစ်ခုကို ဖော်ဆောင်ရာမှာ ဌာနဆိုင်ရာများ၊ ဝန်ထမ်းအဖွဲ့များကြား ပူးပေါင်းဆောင်ရွက်ခြင်းနဲ့ အသိပညာမျှဝေခြင်းတို့ကို မြှင့်တင်ပေးရပါမယ်။ လုပ်ငန်းခွင်သုံး အပြန်အလှန် ဆက်သွယ်မှုတွေကို အားပေးပြီး ဝန်ထမ်းတွေအတွက် အကောင်းဆုံး အလေ့အကျင့်များ၊ လုပ်ငန်းတွင်း အောင်မြင်မှုရခဲ့တဲ့ နည်းလမ်းများနဲ့ ဆန်းသစ်တဲ့စိတ်ကူးတွေကို မျှဝေဖို့ ပလက်ဖောင်းများ ဖန်တီးပါ။ စဉ်ဆက်မပြတ် လေ့လာသင်ယူမှုနဲ့ တိုးတက်စေမယ့် ယဉ်ကျေးမှုကို ဖော်ထုတ်ပါ။
ဝန်ဆောင်မှုစံနှုန်းများနဲ့ တိုင်းတာနိုင်တဲ့ မက်ထရစ်တွေကို အကောင်အထည်ဖော်ပါ။
စွမ်းဆောင်ရည်ကို တိုင်းတာဖို့နဲ့ စောင့်ကြည့်ဖို့ ရှင်းလင်းတဲ့ ဝန်ဆောင်မှုစံနှုန်းများနဲ့ တိုင်းတာမှုတွေကို ချမှတ်ပါ။ ဝန်ဆောင်မှု ထူးချွန်မှု ပန်းတိုင်များနဲ့ ကိုက်ညီတဲ့ အဓိကစွမ်းဆောင်ရည် ညွှန်းကိန်းများ (KPIs) ကို သတ်မှတ်ပြီး ဒီမက်ထရစ်များနဲ့ ဝန်ထမ်းတွေရဲ့ စွမ်းဆောင်ရည်ကို ပုံမှန်အကဲဖြတ်ပါ။ ပွင့်လင်းမြင်သာတဲ့ တုံ့ပြန်ချက်နဲ့ ပုံမှန်စွမ်းဆောင်ရည် အကဲဖြတ်ချက်တွေကို ဝန်ထမ်းတွေရဲ့ မျှော်လင့်ချက်များကို နားလည်စေပြီး စဉ်ဆက်မပြတ် တိုးတက်မှုအတွက် ကြိုးပမ်းဖို့ ကူညီပေးပါတယ်။
နည်းပညာကို အသုံးချပါ။
ဝန်ဆောင်မှုပေးရာမှာ ထိရောက်မှုကို မြှင့်တင်ဖို့ နည်းပညာကို အသုံးချပါ။ ဖောက်သည်ဆက်ဆံရေး စီမံခန့်ခွဲမှု (CRM) စနစ်များ၊ help desk ဆော့ဖ်ဝဲနဲ့ တခြား အကူအညီပေးနိုင်တဲ့ ကိရိယာတွေကို အကောင်အထည်ဖော်ပြီး ဖောက်သည်နဲ့ အပြန်အလှန်ဆက်သွယ်မှုတွေကို ချောမွေ့စေပြီး တစ်ဦးချင်းသီးသန့် ဝန်ဆောင်မှုကို ဆောင်ရွက်ပေးနိုင်အောင် နည်းပညာအကူအညီနဲ့ လမ်းဖွင့်ပေးပါ။ အလိုအလျောက်စနစ်နဲ့ ကိုယ်တိုင် ဝန်ဆောင်မှုရွေးချယ်မှုများဟာ သုံးစွဲသူဖောက်သည် ရရှိတဲ့ ဝန်ဆောင်မှုအတွေ့အကြုံကို မြှင့်တင်ပေးနိုင်ပြီး တစ်ဖက်မှာလည်း ဝန်ထမ်းများက တခြားအရေးကြီးပြီး ရှုပ်ထွေးတဲ့ ပြဿနာတွေကို အာရုံစိုက်ဖို့ အချိန်ပိုမိုရရှိလာကာ အကောင်းဆုံးဖြေရှင်းပေးနိုင်မှာပဲ ဖြစ်ပါတယ်။
ဝန်ဆောင်မှုယဉ်ကျေးမှုတစ်ခုကို ဖော်ဆောင်ရာမှာ အဖွဲ့အစည်းရဲ့ အဆင့်အားလုံးပါဝင်နိုင်တဲ့ မဟာဗျူဟာနဲ့ ဘက်စုံချဉ်းကပ်မှုနည်းလမ်းတွေ လိုအပ်ပါတယ်။ လုပ်ငန်းရဲ့ လက်ခံတန်ဖိုးထားတဲ့ စံများကို သတ်မှတ်ခြင်း၊ ဝန်ထမ်းများနဲ့ ထိတွေ့ဆက်ဆံမှုကို မြှင့်တင်ခြင်း၊ လေ့ကျင့်ရေးမှာ ရင်းနှီးမြှုပ်နှံခြင်းနဲ့ ဖောက်သည် တုံ့ပြန်ချက်တွေကို ဦးစားပေးခြင်းက အဖွဲ့အစည်းများဟာ ထူးခြားတဲ့ ဝန်ဆောင်မှုတွေကို အမြဲမပြတ် ပေးဆောင်နိုင်တဲ့ လုပ်ငန်းခွင်ယဉ်ကျေးမှုတစ်ခုကို ဖန်တီးနိုင်ပါတယ်။ ပူးပေါင်းဆောင်ရွက်ခြင်း၊ ဝန်ဆောင်မှုစံနှုန်းများကို အကောင်အထည်ဖော်ခြင်းနဲ့ နည်းပညာကို အသုံးချခြင်းက ဖောက်သည်ဗဟိုပြု ပတ်ဝန်းကျင်တစ်ခု ဖွံ့ဖြိုးတိုးတက်ရေးကို ပိုမိုအထောက်အကူ ဖြစ်စေပါတယ်။ ပြည့်စုံခိုင်မာတဲ့ ဝန်ဆောင်မှုယဉ်ကျေးမှုကို ဖော်ဆောင်ခြင်းက အဖွဲ့အစည်းများဟာ ယှဉ်ပြိုင်နိုင်စွမ်းရှိလာကာ ဖောက်သည်ရဲ့ မိမိလုပ်ငန်းအပေါ် သစ္စာစောင့်သိမှုကို ထိန်းသိမ်းထားနိုင်ပြီး နောက်ဆုံးမှာ လုပ်ငန်းရေရှည်အောင်မြင်မှုကို ရရှိနိုင်မှာပဲ ဖြစ်ပါတယ်။
ရည်ညွန်းချက်
Fishman, C. (2017). The Service Culture Handbook: A Step-by-Step Guide to Getting Your Employees Obsessed with Customer Service. Adept Publishing.
O'Neill, M. (2020). Creating a Service Culture: How to Drive Customer Loyalty and Business Success. Wiley.
U Myo Htet Naing
B.Com (Hons), M.Com (YIE)