ပြောဆိုဆက်ဆံရေးစွမ်းရည်ကိုမြှင့်တင်ဖို့အတွက် နည်းလမ်း ၁၀ ခု
စဉ်ဆက်မပြတ်တိုးတတ် ပြောင်းလဲမှုများနဲ့အတူ အဖွဲ့အစည်းများ၊ လုပ်ငန်းများဟာလည်း ကြီးမားကျယ်ပြန့် လာပါတယ်။ အဖွဲ့အစည်းများ၊ လုပ်ငန်းများ ကြီးထွားလာတာနဲ့အမျှ လုပ်ငန်းအတွင်း ဝန်ထမ်းတစ်ဦးချင်းရဲ့ ပြောဆိုဆက်ဆံရေး စွမ်းရည်ကလည်း အရေးပါတဲ့ အခန်းကဏ္ဍ တစ်ခုအဖြစ် ပါဝင်လာပါတယ်။ လွန်ခဲ့တဲ့နှစ် အနည်းငယ်က အသုံးချသုတေသနအဖွဲ့အစည်းတစ်ခုဖြစ်တဲ့ Canada Conference Board မှ လုပ်ငန်းခွင်မှာ ဝန်ထမ်းများ အောင်မြင်ဖို့အတွက် လိုအပ်တဲ့ အခြေခံအရည်အချင်းတွေကို စာရင်းပြုစုခဲ့ပါတယ်။ အဲဒီထဲမှ ပေါင်းသင်းဆက်ဆံရေးစွမ်းရည်ဟာ လုပ်ငန်းခွင်မှာ အောင်မြင်ဖို့ လိုအပ်တဲ့ အခြေခံအရည်အချင်းများ စာရင်းမှာ ထိပ်ဆုံးမှ ရပ်တည်နေပါတယ်။
ယခုခေတ်မှာ လူမှုမီဒီယာကွန်ရက်များ ထွန်းကားလာတဲ့အခါ လုပ်ငန်းခွင်မှာ ဝန်ထမ်းအချင်းချင်းကြား တရားဝင်ဆက်သွယ်မှု နည်းလမ်းများစွာရှိလာပြီး ပုံမှန်ထက် ပိုမိုလွယ်ကူ မြန်ဆန်လာပါတယ်။ လုပ်ငန်းခွင်မှာ အောင်မြင်တဲ့ လူအများစုကို လေ့လာကြည့်တဲ့အခါ သူတို့ရဲ့ စရိုက်လက္ခဏာတွေထဲကတစ်ခုမှာ ထိရောက်စွာ ပြောဆိုဆက်ဆံနိုင်မှု ဖြစ်ပါတယ်။ အဲဒီအချက်က ပြောဆိုဆက်ဆံရေးစွမ်းရည်ရဲ့ အရေးပါမှုကို ထင်ရှားစေပါတယ်။ ဒါကြောင့် ဒီဆောင်းပါးမှာ ပြောဆိုဆက်ဆံရေးစွမ်းရည်ကို မြှင့်တင်ပေးနိုင်တဲ့ အချက် (၁၀) ချက်ကိုမျှ ဝေသွားပါမယ်။
၁။ နားထောင်ပါ။
ပြောဆိုဆက်ဆံရေးစွမ်းရည်ကို မြှင့်တင်ဖို့အတွက် လိုအပ်တဲ့ ပထမအချက်မှာ တစ်ဖက်လူ ပြောနေတဲ့ စကားကို အမှန်တကယ် နားထောင်ပါ။ နားလည်မှုလွဲမှားခြင်းမဖြစ်စေဖို့ ရှင်းလင်းချက်တောင်းပါ။ ဒါ့အပြင် တစ်ဖက်လူပြောနေတဲ့ စကားကိုနားထောင်နေစဉ်မှာ ကြားဖြတ်အလုပ်များလုပ်ခြင်းကို ရှောင်ပါ။ ဆိုလိုတာက အီးမေးလ်ပို့ခြင်း၊ စာတိုပို့ခြင်း၊ ဖုန်းပြောခြင်း အစရှိတာတွေကို ရှောင့်သင့်ပါတယ်။ ဒါမှသာ တစ်ဖက်လူပြောနေတဲ့စကားကို အာရုံစိုက်နိုင်မှာဖြစ်ပြီး ပြည့်ပြည့်၀၀ နားလည်မှာပဲ ဖြစ်ပါတယ်။
၂။ သင်က ဘယ်သူနဲ့စကားပြောနေတာလဲဆိုတာ သတိပြုပါ။
မိတ်ဆွေ အပေါင်းအသင်းနဲ့ ဆက်သွယ်တဲ့အခါမှာ အတိုကောက်နဲ့ ဗန်းစကားတွေကို အသုံးပြုဖို့ အဆင်ပြေပေမယ့်လည်း လုပ်ငန်းခွင်မှာ သင့်အလုပ်ရှင်၊ လုပ်ဖော်ကိုင်ဖက်တို့ကို အီးမေးလ်ပို့ခြင်း ဒါမှမဟုတ် စာပို့ပါက "ဟေး" တို့၊ ဗန်းစကားများ အသုံးပြုတာတို့ မသင့်တော်ပါဘူး။ သင် အသုံးပြုလိုက်တဲ့ အတိုကောက်စကားလုံး ဆိုလိုရင်းကို တစ်ဖက်လူက သိတယ်လို့ ယူဆလို့မရပါဘူး။ တချို့ အတိုကောက် စကားလုံးတွေက မတူညီတဲ့လူတွေအတွက် အဓိပ္ပာယ်အမျိုးမျိုးရှိနိုင်ပါတယ်။ ဒါကြောင့် ဆက်သွယ် ပြောဆိုနေသူ အပေါ်မူတည်ပြီး ပေးချင်တဲ့ မက်ဆေ့ချ်ကို ရှင်းလင်းပြတ်သားစွာ ပြောဆိုဖို့ လိုအပ်ပါတယ်။
၃။ Body Language ကို အသုံးပြုပါ။
မျက်နှာချင်းဆိုင်တွေ့ဆုံမှုများ ဒါမှမဟုတ် အွန်လိုင်းတွေ့ဆုံမှုများလုပ်ဆောင်ရာမှာ Body Language က အရေးကြီးပါတယ်။ သင် ပြောချင်တဲ့ အကြောင်းအရာများ ပိုမိုရုပ်လုံးကြွစေဖို့ မျက်နှာအမူအရာ (ဒါမှမဟုတ်) လက်အမူအရာများကို အသုံးချတတ်ပါစေ။ ဒါ့အပြင် သင်ပြောဆိုတဲ့ အကြောင်းအရာတွေကို နားထောင်သူများ စိတ်ဝင်စားမှု ရှိ၊မရှိကို Eye Contact ရယူခြင်းဖြင့် အကဲဖြတ်ပါ။
၄။ သင့် Message ကို မပို့ခင် စစ်ဆေးပါ။
စာလုံးပေါင်း သတ်ပုံ မှန်၊မမှန်ကို Message မပို့ခင်စစ်ဆေးဖို့ လိုအပ်ပါတယ်။ ဒါ့အပြင် သင်ပေးချင်တဲ့ message ရဲ့ အဓိပ္ပာယ်ပေါ်လွင်စေဖို့လည်း သတိပြုပါ။ ထိရောက်တဲ့ ပြောဆိုဆက်ဆံရေးဖြစ်စေဖို့ သင့် message ကို မပို့ခင် နှစ်ခါလောက် စစ်သင့်ပါတယ်။
၅။ အတိုချုံ့ပြီး အတိအကျပြောပါ။
စာနဲ့ဆက်သွယ်ခြင်း ဒါမှမဟုတ် စကားနဲ့ ပြောဆိုဆက်သွယ်ခြင်းမှာ သင်ပြောလိုတာတွေကို တစ်ဖက်လူ နားလည်စေဖို့ လုံလောက်တဲ့ အချက်အလက်တွေကို အတိုချုံပြီး အတိအကျပြောတတ်ပါစေ။ တကယ်လို့ သင်က အီးမေးလ်နဲ့ ဆက်သွယ်ပါက အီးမေးလ်ပြန်လည်မပို့ဆောင်ခင် အီးမေးလ်တစ်ခုလုံးကို ဖတ်ထားကြောင်း သေချာပါစေ။
၆။ အချက်အလက်တွေကို ရေးမှတ်ပါ။
တခြားသူတစ်ဦးနဲ့ အရေးကြီးတဲ့ စကားပြောနေချိန် ဒါမှမဟုတ် အစည်းအဝေးရှိတဲ့အခါ အချက်အလက်တွေကို ရေးမှတ်ထားခြင်းက ထိရောက်တဲ့ ပြောဆိုဆက်ဆံရေး တည်ဆောက်ပါ။ အဲဒီအချက်အလက်တွေကို မှန်ကန်မှု ရှိ၊မရှိကို Confirm ဖို့ လိုအပ်ပါတယ်။ ဒါ့ကြောင့် ပြောခဲ့တဲ့အကြောင်းအရာတွေကို နားလည်ကြောင်းနဲ့ မှန်ကန်ကြောင်း သေချာစေဖို့ နောက်ဆက်တွဲအီးမေးလ်တစ်စောင်ပို့ပေးခြင်း ဒါမှမဟုတ် မှတ်တမ်းစာရွက် ပေးပို့ခြင်းဖြင့် Follow up လုပ်ပါ။
၇။ အခြေအနေပေါ်မူတည်ပြီး ဖုန်းနဲ့ဆက်သွယ်ပါ။
သင့်မှာ ပြောစရာတွေ အများကြီးရှိနေတယ်ဆိုရင် အီးမေးလ်ပို့မယ့်အစား ဖုန်းခေါ်ပါ။ အီးမေးလ်နဲ့ ဆက်သွယ်ခြင်းက ကောင်းမွန်ပေမယ့်လည်း တစ်ခါတစ်ရံမှာ အကြောင်းအရာများစွာပြောဖို့ လိုအပ်ပါက နှုတ်နဲ့ပြောဆိုခြင်းက ပိုပြီးလွယ်ကူထိရောက်စေနိုင်ပါတယ်။
၈။ စကားမပြောခင် စဉ်းစားပါ။
အရေးကြီးတဲ့ အကြောင်းအရာတွေပြောဖို့ လိုအပ်ပါက စကားမပြောခင် သေချာစဉ်းစားဖို့ လိုအပ်ပါတယ်။ ဒါကြောင့် စိတ်ထဲရောက်နေတဲ့ ပထမဆုံးအရာကို မပြောပါနဲ့။ ခဏလောက်အချိန်ပေးပြီး သင်ပြောချင်တဲ့အရာနဲ့ သင်ဘယ်လိုပြောမလဲဆိုတာကို သေချာအာရုံစိုက်ပါ။ ဒီအလေ့အကျင့်တစ်ခုက သင့်ကို အရှက်ရစေမယ့် အရာတွေကနေ ရှောင်ရှားနိုင်ပါလိမ့်မယ်။
၉။ လူတိုင်းကို တန်းတူရည်တူဆက်ဆံပါ။
ဘယ်သူ့ကိုမှ နှိမ့်ချမပြောဘဲ လူတိုင်းကို လေးလေးစားစားဆက်ဆံပါ။ တခြားသူတွေကို သင်နဲ့ တန်းတူဆက်ဆံပါ။ အလုပ်ခွင်မှာ လုပ်ဖော်ကိုင်ဖက်တွေကို လေးလေးစားစားနဲ့ တန်းတူဆက်ဆံဖို့ လိုအပ်ပါတယ်။
၁၀။ အကောင်းမြင်စိတ်ထားရှိပြီး ပြုံးပါ။
ဖုန်းပြောနေချိန်မှာတောင် သင့်ရဲ့အပြုသဘောဆောင်တဲ့ စိတ်နေသဘောထားကိုပြဖိုု့ လေးလေးစားစားပြောဆို ဆက်ဆံပါ။ မကြာခဏ ပြုံးပြပြီး အပြုသဘောဆောင်ပြီး ကောင်းမွန်တဲ့ သဘောထားကို ထုတ်ဖော်တဲ့အခါ လူအများက သင့်ကို ကောင်းမွန်တဲ့ အပြုသဘောဆောင်တဲ့ အမူအရာများ ပြန်လည်တုံ့ပြန်လာမှာ ဖြစ်ပါတယ်။ထိရောက်စွာပြောဆိုဆက်သွယ်ခြင်းက သင်ယူနိုင်တဲ့ ကျွမ်းကျင်မှုတစ်ခုဖြစ်တာကြောင့် အထက်မှာ ဖော်ပြ ထားတဲ့ အကြံပြုချက် (၁၀) ချက်ကို လိုက်နာခြင်းဖြင့် သင့်ရဲ့ပြောဆိုဆက်ဆံရေးစွမ်းရည်ကို မြှင့်တင်နိုင်မှာပဲ ဖြစ်ပါတယ်။
ManpowerGroup ရဲ့ 10 Ways to Improve Your Communication Skills ကို ဆီလျော်အောင် မြန်မာဘာသာပြန်ဆို ကိုးကားရေးသားထားပါတယ်။
Daw Thwet Shwe Yee Htun
B. Com, M.com (MEUE)
Meiktila University of Economics