လုပ်ငန်းခွင်အတွင်း Interpersonal Skills မြှင့်တင်နိုင်ဖို့အတွက် သိထားရမယ့်အချက်များ
Interpersonal Skills ဆိုတာက လုပ်ငန်းခွင်မှာ သင့်ရဲ့လုပ်ဖော်ကိုင်ဖက်တွေနဲ့အတူ ကောင်းမွန်တဲ့ဆက်ဆံရေး တည်ဆောက်နိုင်ခြင်းစွမ်းရည်ကို ဆိုလိုပါတယ်။ Interpersonal Skills ကောင်းမွန်ခြင်းဟာ လူမှုရေးနယ်ပယ်မှာ သင့်ကိုယ်သင်ယုံကြည်မှုရှိလာပြီး ပညာရှင်တစ်ယောက်ကဲ့သို့ ပြုမူပြောဆိုလာနိုင်ပါလိမ့်မယ်။ လုပ်ငန်း ခွင်ထဲမှာဖြစ်စေ၊ ကိုယ်ရေးကိုယ်တာနဲ့ ပတ်သက်တာဖြစ်စေ လူတွေနဲ့ လိုက်လျောညီထွေ ပေါင်းသင်းဆက်ဆံ ပြောဆိုတတ်ခြင်းဟာ ဘဝတစ်လျှောက် အောင်မြင်မှုတွေရရှိနိုင်ဖို့အတွက် အရေးကြီးတဲ့ အရာတစ်ခု ဖြစ်ပါတယ်။ Interpersonal Skills တိုးတက်ကောင်းမွန်လာအောင် လုပ်နိုင်ပါက သင်ဟာလုပ်ငန်း နယ်ပယ်တိုင်းမှာ လူတော်လူကောင်းတစ်ယောက်အဖြစ် ရပ်တည်လာနိုင်ပါလိမ့်မယ်။
သင့်ရဲ့ Interpersonal Skills တိုးတက်လာဖို့အတွက်
နံပါတ် (၁) - စိတ်ခံစားချက်များကို ဆင်ခြင်ပြုမူရပါမယ်။ လုပ်ငန်းခွင်ဆိုတာက သင့်ရဲ့စိတ်ခံစားချက်တွေကို ချပြသင့်တဲ့နေရာ မဟုတ်ပါဘူး။ သင့်ရဲ့စိတ်က ပျော်ရွှင်တယ်လို့ ခံစားရသည်ဖြစ်စေ၊ စိတ်ဖိစီးနေတာပဲဖြစ်စေ စိတ်ခံစားချက်တွေကို ထိန်းချုပ်ဖို့ လိုအပ်ပါတယ်။ ဒါ့အပြင် လုပ်ဖော်ကိုင်ဖက်များ၊ Customer များနဲ့ ဆက်ဆံရာတွင်လည်း စိတ်ကို အေးဆေးတည်ငြိမ်စွာထားပြီး ပြောဆိုသင့်ပါတယ်။ တစ်ဖက်လူကို လေးလေးစားစား ဆက်ဆံမယ်ဆိုရင် အရာရာတိုင်းမှာ အဆင်ပြေချောမွေ့နိုင်ပြီး တစ်ဉီးနဲ့တစ်ဉီး နားလည်မှုလွဲတာမျိုးတွေကိုလည်း ရှောင်ရှားနိုင်ပါလိမ့်မယ်။
နံပါတ် (၂) - အာရုံစိုက်ပြီး နားထောင်တတ်တဲ့ အကျင့်ကို မွေးမြူပါ။ တစ်ယောက်ယောက်က ပြောဆိုတဲ့စကားကို ဂရုတစိုက်နဲ့ အာရုံစိုက်ပြီး နားထောင်ပေးတတ်ခြင်းက တစ်ဖက်သူကို လေးစားတဲ့ အပြုအမူတစ်ခု ဖြစ်ပါတယ်။ ဥပမာ သင့်ရဲ့ အထက်လူကြီး ဒါမှမဟုတ် လုပ်ဖော်ကိုင်ဖက်တစ်ယောက်က အကြောင်းအရာတစ်ခုကို ပြောဆိုနေချိန်မှာ သင့်ရဲ့မျက်လုံးက တခြားတစ်နေရာကို ကြည့်နေတာမျိုး၊ အာရုံစိုက်မိနေတာမျိုး မလုပ်မိပါစေနဲ့။ မျက်လုံးချင်းဆုံပြီးတော့ Attention ရှိရှိနဲ့ သူဘာကိစ္စနဲ့ ပတ်သက်ပြီးပြောနေတာလဲ၊ ပြောနေတဲ့အကြောင်း အရာပေါ်မှာ အာရုံစိုက်ပြီး နားထောင်တတ်ဖို့ လိုအပ်ပါတယ်။ နားထောင်ပြီးချိန်မှာလည်း ပွင့်ပွင့်လင်းလင်း ပြန်လည်ပြောဆိုပါ။ အငြင်းပွားရမယ့် အပြုမူမျိုး မလုပ်သင့်ပါဘူး။ ဒါမှသာ သင်နဲ့ အထက်လူကြီး ဒါမှမဟုတ် လုပ်ဖော်ကိုင်ဖက်တွေကြားမှာ ယုံကြည်မှုကို တည်ဆောက်နိုင်မှာဖြစ်ပါတယ်။
နံပါတ် (၃) - ယုံကြည်ချက်ရှိရှိ ပြုမူပြောဆိုပါ။ လုပ်ငန်းခွင်မှာ ယုံကြည်ချက်ရှိရှိ ပြုမူပြောဆိုတတ်ခြင်းကလည်း သင့်ရဲ့ Interpersonal Skills တိုးတက်လာဖို့ အရေးပါတဲ့ အချက်တစ်ခု ဖြစ်ပါတယ်။ သင်ကိုယ်တိုင်ယုံကြည်ပြီး မှန်တယ်ထင်တဲ့အရာကို ရဲရဲဝံ့ဝံ့ထုတ်ဖော်ပြောဆိုတတ်ရပါမယ်။ သင်ကိုယ်တိုင်လည်းမသိ၊ မရေရာတဲ့ အရာမျိုးကို မပြောဆိုသင့်ပါဘူး။ တကယ်လို့ သေချာရေရာမှုမရှိတာကို ထုတ်ဖော်ပြောလိုက်မယ်ဆိုရင် တစ်ချိန်ချိန်မှာ သင့်အတွက် အရှက်စရာတွေ ဖြစ်လာနိုင်ပါတယ်။
နံပါတ် (၄) - စကားပြောတဲ့အခါမှာ အသုံးအနှုန်းကို သေချာဂရုစိုက်ပြီး ပြောဆိုပါ။ လုပ်ငန်းခွင်မှာ စကားပြောတဲ့အခါ အသုံးအနှုန်းကို သေချာဂရုစိုက်ပြီး ပြောဆိုတတ်ဖို့လိုပါတယ်။ တစ်ပါးသူကို စိတ်အနှောင့်အယှက်ဖြစ်စေသော၊ စော်ကားရာရောက်သော၊ အနှောင့်အသွားမလွတ်သော စကားလုံးများကို ပြောဆိုခြင်းမှ ရှောင်ရှားသင့်ပါတယ်။ ယဉ်ကျေးသော၊ နားဝင်ချိုသော အသုံးအနှုန်းများကိုရွေးပြီး ပြောဆိုတတ်ခြင်းကလည်း သင့်ရဲ့ Interpersonal Skills ကို တိုးတက်လာစေမှာ ဖြစ်ပါတယ်။ တကယ်လို့ သင်ဟာ မသင့်တော်တဲ့ လေသံ၊ အသုံးအနှုန်းကို သုံးလိုက်ပါက တစ်ပါးသူအတွက်လည်း စိတ်အနှောင့်အယှက်ဖြစ်သွားစေနိုင်ပါတယ်။ ဒါ့ကြောင့် လုပ်ငန်းခွင်မှာ တစ်ဦးနဲ့တစ်ဦး အမြဲရင်းရင်းနှီးနှီး ပြောဆိုဆက်ဆံသင့်ပါတယ်။ ရင်းရင်းနှီးနှီး ပြောဆိုရမယ် ဆိုပေမယလည်း သင့်ကိုယ်သင် အမြဲနှိမ့်ချတဲ့ လေသံ၊ အပြုအမူကိုသုံးခြင်းမှလည်း ရှောင်ရှားဖို့ လိုအပ်ပါ လိမ့်မယ်။
နံပါတ် (၅) - လူမှုဆက်ဆံရေး အပြုအမူတွေနဲ့ပတ်သက်ပြီး အကြံပြုချက်များ ရယူပါ။ တစ်ပါးသူတွေရဲ့ အကြံပြုချက်များဟာ လုပ်ငန်းခွင်အတွင်းမှာ သင်ရဲ့ကိုယ်ရည်ကိုယ်သွေးနဲ့ Interpersonal Skills တိုးတက် လာစေဖို့ ကူညီပေးနိုင်ပါတယ်။ သင့်ရဲ့ Interpersonal Skills ကို တိုးတက်ချင်ပါက လုပ်ဖော်ကိုင်ဖက်တွေဆီမှ သင်ရဲ့ လူမှုဆက်ဆံရေးနဲ့ ပတ်သက်ပြီး အားသာချက်၊ အားနည်းချက်များကို မေးမြန်းပါ။ သင့်အပြုအမူနဲ့ ပတ်သက်ပြီး မကောင်းတဲ့မှတ်ချက်ပေးလာခဲ့ရင်လည်း စိတ်ပျက်နေမယ့်အစား လက်ခံပြီး ပြုပြင်သင့်ပါတယ်။ သင့်အပြုအမှုရဲ့ အားနည်းချက်၊ အားသာချက်များကို သေချာနားလည်ခြင်းအားဖြင့် ပိုမိုကောင်းမွန်တဲ့ လူမှု ဆက်ဆံရေးရှိလာအောင် လုပ်ဆောင်နိုင်ပါတယ်။
နံပါတ် (၆) - တခြားသူများကို ပံ့ပိုးကူညီပါ။ လုပ်ငန်းခွင်မှာ တခြားသူတွေရဲ့ အခက်အခဲတွေကို ကူညီပံ့ပိုး ပေးတာဟာ ကောင်းမွန်တဲ့အရာ ဖြစ်ပါတယ်။ ကိုယ်ချင်းစာနာမှုဟာ တခြားသူတွေကို သင့်ဆီ ဆွဲဆောင်နိုင်သော ကောင်းမွန်တဲ့ အပြုအမူတစ်ခုဖြစ်ပြီး Interpersonal Skills ကို တိုးတက်စေဖို့ နည်းလမ်းတစ်ခုဆိုရင်လည်း မမှားပါဘူး။ လုပ်ဖော်ကိုင်ဖက်တွေနဲ့အတူ အလုပ်လုပ်ရခြင်းဟာ တစ်ဦးတစ်ယောက်ချင်းစီနဲ့ ပိုမိုကောင်းမွန်တဲ့ ဆက်ဆံရေးရလာအောင်၊ အချင်းချင်းပူးပေါင်းဆောင်ရွက်တတ်လာအောင်၊ ပဋိပက္ခများကို ဖြေရှင်းတတ်လာအောင် သင်ယူရစေပါတယ်။ ဒါကြောင့် အခက်အခဲကြုံနေရတဲ့၊ နာကျင်ခံစားနေရတဲ့ တစ်စုံတစ်ယောက်ကို တွေ့ခဲ့မယ်ဆိုရင် နှစ်သိမ့်ပေးပြီး အကူအညီပေးနိုင်ပါတယ်။ တကယ်လို့ ပြဿနာကို မဖြေရှင်းပေးနိုင်ရင်တောင် နွေးထွေးတဲ့ စကားလုံးများနဲ့ နှစ်သိမ့်ပေးဖို့ ကြိုးစားပါ။
နံပါတ် (၇) - သင့်အပေါ် ဝေဖန်လာသူတွေကို အပြုသဘောဆောင်တဲ့ နည်းလမ်းဖြင့် ပြုမူပါ။ လုပ်ငန်းခွင်မှာ ဝေဖန်မှုတွေနဲ့ ကြုံရတဲ့အခါ ပြန်ပြီးမတုံ့ပြန်မိအောင် ဆင်ခြင်နိုင်ဖို့ လိုပါတယ်။ ဘဝဟာ အမြဲတမ်း ချောမွေ့နေမှာမဟုတ်ဘဲ အဆုံးမရှိတဲ့လမ်းကို လျှောက်လှမ်းနေရတာ ဖြစ်ပါတယ်။ ဒါပေမဲ့ သင့်မှာကောင်းမွန်တဲ့ Interpersonal Skills ရှိမယ်ဆိုရင်တော့ သင်ဟာ ခက်ခဲတဲ့အခြေအနေများကို အလွယ်တကူ ကျော်ဖြတ်နိုင်မှာ ဖြစ်ပါတယ်။ သင့်အပေါ် ဝေဖန်မှုတွေကိုလက်ခံကာ ဝေဖန်ခံရတဲ့အကြောင်းရင်းများကို ရှာဖွေလေ့လာပြီး ထိုဝေဖန်မှုများကို အပြုသဘောဆောင်တဲ့ လုပ်ဆောင်ချက်များအဖြစ် ပြောင်းလဲပါ။ ထိုအပြုအမူဟာ ဝေဖန်ခံရတဲ့အပေါ် မကောင်းတဲ့စိတ်ခံစားမှုကို ပျောက်ပြယ်သွားစေနိုင်ပြီး သင့်ကိုယ်သင့် ပြန်ပြီးဝေဖန်မှုများ ပြုလုပ်လာနိုင်အောင် အထောက်အပံ့ ဖြစ်စေနိုင်ပါတယ်။ ဒါကြောင့် ဝေဖန်မှုတွေနဲ့ ကြုံလာရတဲ့အခါ စိတ်ကိုလွှတ်မပေးလိုက်ဘဲ အေးဆေးစဉ်းစားပြီးမှ တုံ့ပြန်သင့်ပါတယ်။
အချုပ်အားဖြင့်ဆိုရသော် အပြိုင်အဆိုင်များတဲ့ လုပ်ငန်းခွင်နယ်ပယ်မှာ အောင်မြင်မှုရရှိဖို့အတွက် Interpersonal Skills က အရေးကြီးပါတယ်။ အလုပ်ရှင်များဟာ လုပ်ဖော်ကိုင်ဖက်များနဲ့ ဆက်ဆံရေးကောင်းသော လူတစ်ဉီးချင်းစီကို အမြဲတန်ဖိုးထားကြပါတယ်။ သင့်ရဲ့ Interpersonal Skills ကို တိုးတက်အောင် လုပ်ဆောင်ခြင်းအားဖြင့် ဘယ်အဖွဲ့အစည်းအတွက်မဆို တန်ဖိုးထားရတဲ့သူတစ်ယောက် ဖြစ်လာနိုင်ပါတယ်။
How to Improve Interpersonal Skills at Work | SkillsYouNeed ဆောင်းပါးမှ သင့်တော်သလို ကိုးကားပြီး ဘာသာပြန်ဆိုထားခြင်းပဲ ဖြစ်ပါတယ်။
Daw Sandi Su Hlaing
B.C.Sc, (U.C.S.Y)
B.C.Sc, (Hons) (U.C.S.Y)
M.C.Sc, (U.C.S.Y)