The Dos and Don’ts in Office (Unwritten rules)
ဝန်ထမ်းတစ်ယောက်ဟာ အဖွဲ့စည်းတစ်ခုခုမှာ အလုပ်လုပ်ပြီဆိုတာနဲ့ လုပ်ငန်းကချမှတ်ထားတဲ့ စည်းမျဉ်းစည်းကမ်းကို လိုက်နာကြရစမြဲပါ။ ကျွန်တော်တို့ အလုပ်ခွင်တွေ ရုံးတွေမှာ တရားဝင် ချမှတ်ထားတဲ့ မှန်မှန်ကန်ကန်ကျင့်ဝတ်တွေ ရှိနေပေမယ့်လည်း တစ်ခါတလေ ကိုယ့်ရဲ့ အသက် မွေးဝမ်းကြောင်း အလုပ်နယ်ပယ်ကို ထိခိုက်စေနိုင်မယ့် အပြုမူမျိုးတွေ၊ ကိုယ့်လုပ်ဖော်ကိုင်ဖက်တွေကို စိတ်အနှောင့်အယှက်ဖြစ်စေနိုင်မယ့် အရာတွေဖြစ်တဲ့ တရားဝင်သတ်မှတ်ထားတာမျိုးမရှိတဲ့ စည်းမျဉ်း တချို့ကို ရှောင်ကြဉ်ဖို့နဲ့ ဆောင်ထိန်းဖို့ကလည်း ပိုအရေးကြီးတဲ့ စဉ်းစားစရာတစ်ခုပါ။ ဒါဆိုရင် ကိုယ့်ရဲ့အလုပ်၊ ရုံးမှာဘာတွေကို ဆောင်သင့်ပြီး ဘာတွေကို ရှောင်သင့်သလဲဆိုတာကို ဆက်ပြီး ပြောပြပေးပါမယ်။
The Don’ts in Office
၁။ ကိုယ်ရေးကိုယ်တာတွေ မပြောပါနဲ့။
ကျွန်တော်တို့တွေဟာ အလုပ်ခွင်မှာ ကိုယ့်ရဲ့ ပုဂ္ဂိုလ်ရေးကိစ္စတွေကို လုပ်လေ့ရှိကြပါတယ်။ ဥပမာ ဖုန်းပြောတာ၊ မိသားစုကိစ္စတွေကို ညည်းငြူပြတာ။ ဒီလိုလုပ်တာက ကိုယ့်အနီးနားမှာရှိတဲ့ လုပ်ဖော် ကိုင်ဖက်တွေကို စိတ်အနှောင့်ယှက်ဖြစ်စေပြီး စိတ်မသက်မသာ ဖြစ်စေပါတယ်။ ဒီတော့ ဖုန်းနဲ့ပဲဖြစ်ဖြစ်၊ လူတွေ့ပြီးပဲဖြစ်ဖြစ် ကိုယ်ရေးကိုယ်တာ ကိစ္စတွေပြောစရာရှိတဲ့အခါ ဆင်ခြင်ပါ၊ ဖြစ်နိုင်ရင် ရုံးခန်းအပြင်ထွက်ပြောပါ၊ (ဒါမှမဟုတ်) တိုးတိတ်စွာ အမြန်ဆုံးပြောပါ။
၂။ ကိုယ်ရေးကိုယ်တာ ခံစားချက်တွေကို ရုံးကိုသယ်မလာပါနဲ့။
လူတိုင်းက ကိုယ့်အခြေအနေနဲ့ကိုယ်ပါ၊ ကိုယ့်ခံစားချက်နဲ့ကိုယ်ပါ၊ ဘယ်သူမှ ကိုယ့်ရဲ့ ကိုယ်ရေး ကိုယ်တာခံစားချက်တွေကို လိုတာထက်ပိုပြီး နားထောင်ချင်မှာ မဟုတ်ပါဘူး။ ကိုယ့်အတွက် ကိုယ်ရေး ကိုယ်တာခံစားချက်တွေအတွက် အချိန်လိုခဲ့ရင် ကိုယ့်ရဲ့ အထက်လူကြီးနဲ့ ဆက်သွယ်ပြီး အကြံ တောင်းပါ၊ တိုင်ပင်ပါ။ တကယ်လို့ ကိုယ့်ရဲ့ စိတ်ခံစားချက်က အလုပ်နဲ့ပတ်သက်နေတယ်ဆိုရင် HR ကို ဆက်သွယ်ပါ၊ အကျိုးကြောင်းပြောပြသင့်ပါတယ်။ ဘေးနားမှာရှိတဲ့ လုပ်ဖော်ကိုင်ဖက်တွေကို ဒုက္ခမပေးပါနဲ့။
၃။ အတင်းမပြောပါနဲ့။
အတင်းပြောတာက ရုံးတွင်းမှာလည်း မလုပ်သင့်သလို အပြင်လူမှုပတ်ဝန်းကျင်မှာပါ မလုပ်သင့်တဲ့ အရာပါ။ အတင်းပြောတာကောင်းတယ်လို့ထင်နေရင် ဒါဟာ ကိုယ့်ကိုယ်ကိုယ် ယုံကြည်လို့ မရတဲ့ လူဆိုတဲ့ ခေါင်းစဉ်အောက်ကို တွန်းပို့ခံနေရတာနဲ့ အတူတူပါပဲ။ အကြောင်းက အတင်းပြောတဲ့ လူတွေကို ဘယ်သူမှ မယုံကြည်ကြပါဘူး။ ကိုယ်ပြောနေတဲ့အတင်းက တစ်ဖက်လူဆီ ရောက်သွားတဲ့အခါ အလုပ်ဆက်ရံရေးတွေပါ ထိခိုက်စေနိုင်ပါတယ်။
၄။ အနံ့ပြင်းတဲ့ အစားစားတွေ ရုံးတွင်းမှာ မစားပါနဲ့။
ဒီအချက်လည်း လုပ်ငန်းခွင်မှာ အမူအကျင့်ကောင်းနဲ့ ပတ်သက်လာတဲ့အခါ မှတ်သားထားရမယ့် အရေးကြီးဆုံးအချက်တစ်ခုပါပဲ။ ဥပမာ ကိုယ်က ဒူးရင်းသီးကြိုက်တယ်ဆိုပေမယ့် လုပ်ဖော် ကိုင်ဖက်တွေက ကြိုက်ချင်မှကြိုက်မှာပါ။ ထပ်ပြီးတော့ သိသင့်သေးတာက အရက်သောက်ခြင်းပါ။ အရက်အမူးလွန်တဲ့အခါ ရုံးမှာ အလုပ်ခွင်နဲ့ ဘေးလူတွေကို အနှောင့်ယှက်ဖြစ်စေပါတယ်။
၅။ အလုပ်အီးမေးလ်တွေမှာ အီမိုဂျီတွေကို မသုံးပါနဲ့။
အလုပ်ခွင်အားလုံးမှာ မသုံးရဘူးလို့ သီသန့်သတ်မှတ်ထားတာမျိုး မရှိပေမယ့်လည်း အလုပ်အီးမေးလ် တွေမှာတော့ အီမိုဂျီတွေကို ထည့်မသုံးဘဲ ရှောင်သင့်ပါတယ်။ အထူးသဖြင့် အလုပ်တွင်း စနစ်တကျ ဆက်ရေးရေးပြုလုပ်တဲ့အခါတွေ၊ လုပ်ငန်းနဲ့ ပြင်ပအဖွဲ့အစည်းတွေ၊ ဖောက်သည်တွေနဲ့ ဆက်သွယ်တဲ့ အခါတွေမှာ သတိထားရမှာပါ။
၆။ ဆိုရှယ်မီဒီယာမှာ အလုပ်အကြောင်း မညည်းညူပါနဲ့။
လူတချို့ဟာ ဆိုရှယ်မီဒီယာမှာ အလုပ်နဲ့ပတ်သက်ပြီး ထိန်းသိမ်းတာမျိုးမရှိဘဲ ညည်းငြူတတ် ကြပါတယ်။ အလုပ်မကောင်းကြောင်းပြောတာမျိုး ရှိတတ်ပါတယ်။ ဘယ်လောက်ပဲ ကိုယ့်အကောင့်က လုံခြုံပါတယ်ပြောပြော တစ်နည်းနည်းနဲ့ အလုပ်ခွင်သို့ ပြန်ရောက်နိုင်ပါတယ်။
The Dos in Office
၁။ ရုံးစောစောရောက်ပါစေ။
ရုံးကျင့်ဝတ်နဲ့ပတ်သက်လာရင် အလွယ်ဆုံးစဉ်းစားဖို့ရာတွေထဲမှတစ်ခုက စောစောလာတာဖြစ်စေ၊ ဒါမှမဟုတ် အနည်းဆုံးတော့ အချိန်မီရောက်လာတာဖြစ်စေ လုပ်သင့်ပါတယ်။ ရုံးစောစောလာတာဟာ လုပ်ငန်းနဲ့ အလုပ်အပေါ်မှာ ပိုအာရုံစိုက်နိုင်သလို၊ စည်းကမ်းလိုက်နာမှုရဲ့ တစ်စိတ်တစ်ပိုင်းကိုလည်း ပိုကောင်းစေလို့ပါ။ ဒါဟာ သိပ်မပြောပလောက်ဘူးထင်ရပေမယ့် ရာထူးတိုးကိစ္စတွေထိ သက်ရောက်မှု ရှိပါတယ်။
၂။ အစည်းအဝေးတွေမှာ သေချာအာရုံစိုက်ပြီး ယဉ်ယဉ်ကျေးကျေးပြောဆိုပါ။
အစည်းအဝေးတွေမှာ ကိုယ်ကပြောတဲ့သူပဲဖြစ်ဖြစ်၊ နားထောင်တဲ့သူဘဲဖြစ်ဖြစ် သေချာအာရုံစိုက်နေဖို့ လိုပါတယ်။ တကယ်လို့ အဖွဲ့ဝင်အနေနဲ့ တက်နေတယ်ဆိုရင် ဖုန်းပိတ်ထားပါ။ ကိုယ်ကပြောရတဲ့သူ ဖြစ်နေရင်လည်း အရေးကြီးဖုန်းဖြေရတာမျိုး၊ Email စာပြန်ရတာမျိုးရှိရင် Member တွေကို သေချာအသိပေးပြီးမှ ဆက်လုပ်သင့်ပါတယ်။
၃။ ဖော်ဖော်ရွေရွေရှိပါ။
အလုပ်ခွင်မှာ ကိုယ့်ဌာနက လုပ်ဖော်ကိုင်ဘက်တွေနဲ့ပဲ ဆက်ဆံရေးကောင်းရမှာမဟုတ်ဘဲ တခြားပြင်ပ ဌာနတွေနဲ့ပါ ဖော်ဖော်ရွေရွေရှိသင့်ပါတယ်။ အထူးသဖြင့် ကိုယ်က New staff ဖြစ်နေခဲ့ရင်တောင် လူတွေနဲ့တတ်နိုင်သမျှ လိုက်လံပေါင်းသင်းပါ၊ ပြောဆိုပါ။ ဒီလိုလုပ်တတ်တာက ရုံးတွင်း ဆက်ဆံရေးကောင်း၊ အမူကျင့်ကောင်းတွေ ဖြစ်လို့ပါ။ နောက်ပြီး အကြံဉာဏ်ကောင်းတွေရဖို့ တိုင်ပင်နိုင်တာ၊ သူတို့ဆီက အတွေ့အကြုံကောင်းတွေ သင်ယူနိုင်တာတွေမှာ အထောက်အကူဖြစ်စေပြီး ကိုယ့်ကို တိုးတက်စေနိုင်မှာပါ။
၄။ ကိုယ့်ကွန်ပျူတာနဲ့ ဖုန်းကို အသံတိတ်ထား၊ တိုးထားပါ။
ကိုယ့်ကွန်ပျူတာတို့ ဖုန်းတို့ကို အသံပိတ်ထားတာကလည်း ရှိသင့်တဲ့ရုံးကျင့်ဝတ်တစ်ခုပါပဲ။ ဘာလို့လဲဆိုတော့ မက်ဆေ့ချ်တွေရတိုင်း၊ ဝင်တိုင်း တဂွမ်ဂွမ်မြည်နေတာမျိုးတို့၊ Ringtone သံ အကျယ်ကြီးနဲ့ ဖုန်းဝင်လာတာမျိုးတို့တွေဟာ ဘေးပတ်ဝန်းကျင်မှာရှိတဲ့ လုပ်ဖော်ကိုင်ဖက်တွေကို စိတ် အနှောင့်အယှက် ဖြစ်နိုင်ပါတယ်။
၅။ အကောင်းမြင်စိတ်ထားပါ။
ကိုယ်က ရုံးမှာ အောင်မြင်မှုရလာတဲ့အခါ အပြုံးနဲ့ ဖော်ရွေစွာ နှုတ်ဆက်နိုင်ရမှာဖြစ်သလို၊ တခြားသူတွေရဲ့ အောင်မြင်မှုတွေကိုလည်း ဂုဏ်ပြုတတ်ရမှာ ဖြစ်ပါတယ်။ ကိစ္စရပ်တွေကို ရှုမြင်တဲ့ အခါမှာလည်း အပြုသဘောဆောင်တဲ့ပုံစံနဲ့ တုံ့ပြန်ရမှာပါ။ ရုံးနဲ့အလုပ်မှာ ဒီလိုအပြုသဘော ဆောင်တဲ့စိတ်ထားမျိုးက လုပ်ငန်းခွင်ပတ်ဝန်းကျင်ကို ကောင်းမွန်စေပြီး ကိုယ့်ရဲ့အလုပ်စွမ်းဆောင် ရည်ကို တက်စေနိုင်ပါတယ်။
၆။ လုပ်ဖော်ကိုင်ဖက်တွေရဲ့ စားပွဲခုံနေရာကို လေးစားပါ။
ရုံးအလုပ်ခွင်မှာ စိတ်ရှုပ်စရာကောင်းတဲ့အရာတစ်ခုက ရှုပ်ပွနေတဲ့ စားပွဲခုံပါ။ နောက်ပြီး တချို့လူတွေက တခြားသူတွေရဲ့ စားပွဲခုံပေါ်ထိပါ လိုက်ပြီးပစ္စည်းတင်တာ၊ ထားတာမျိုး လုပ်တတ်ကြပါတယ်။
ဒီလိုကောင်းမွန်တဲ့ ကျင့်ဝတ်တွေကို ရုံးတွင်းနဲ့ ပတ်ဝန်းကျင်မှာ ဆောင်ခြင်း၊ ရှောင်ခြင်းလုပ်ခြင်းဟာ လုပ်ငန်းခွင်ဆက်ဆံရေးတို့၊ ရာထူးတိုးကိစ္စတို့၊ လေးစားချစ်ခင်ခံရမှုတို့မှာ ကောင်းမွန်စေပြီး အကောင်းမြင်စိတ်တို့တိုးစေကာ အလုပ်ခွင်မှာ အဆင်ပြေစေမှာဖြစ်ပါတယ်။
U Zin Lwin Thant
B.Act, M.Act (MUE)