" တစ်နေ့တာလုံး တက်ကြွနေဖို့ နည်းလမ်း (၈) ခု "
လူတော်တော်များရဲ့ အချိန်တွေဟာ စာကြည့်စားပွဲ၊ အလုပ်စားပွဲ၊ ဆိုဖာ ဒါမှမဟုတ် ကား စတဲ့ နေရာတွေမှာ ထိုင်ရင်း ကုန်ဆုံးတတ်ကြ ပါတယ်။ ဒီလိုအထိုင်များတာက ရင်သားနဲ့ အူမကြီးကင်ဆာ ဖြစ်နိုင်ခြေကို မြင့်တက်စေတယ်လို့ သုတေသနတွေက ဖော်ပြထားပါတယ်။ ဒါပေမဲ့ ထိုင်ခြင်းရဲ့ဆိုးကျိုးတွေကို ပြန်လည်တုံ့ပြန်ဖို့ လွယ်ကူတာကိုလည်း တွေ့ရပါတယ်။ အရွယ်ရောက်ပြီး အထိုင်များသူများအတွက် လေ့ကျင့်ခန်း လုပ်ဆောင်ခြင်းဟာ အူမကြီးကင်ဆာဖြစ်နိုင်ခြေ ၃၅ ရာခိုင်နှုန်းနဲ့ ရင်သားကင်ဆာဖြစ်နိုင်ခြေ ၂၅ ရာခိုင်နှုန်း လျှော့ချနိုင်တာကို စစ်တမ်းများအရ တွေ့ရပါတယ်။ ဒါ့အပြင် နေထိုင်မှုပုံစံကို ပြောင်းလဲဖို့ ဘယ်တော့မှ နောက်မကျသေးကြောင်း အသက်အရွယ်မရွေး ပြောင်းလဲနိုင်ကြောင်း ဒီဆောင်းပါးမှာ ဖော်ပြသွားမှာပဲ ဖြစ်ပါတယ်။ သင့်ကျန်းမာရေးကို ပိုမိုကောင်းစေဖို့ အားကစားခန်းမ ဒါမှမဟုတ် စျေးကြီးတဲ့ ကိရိယာတွေ မလိုအပ်ပါဘူး။ သင့်ရဲ့ တစ်နေ့တာအတွက် လွယ်ကူတဲ့ လှုပ်ရှားမှုများပြုလုပ်ဖို့ ရိုးရှင်းတဲ့ နည်းလမ်းရှစ်ခုကို ဖော်ပြပေးလိုက်ပါတယ်။
(၁) သင့်တစ်နေ့တာကို လေ့ကျင့်ခန်းလုပ်ခြင်းနဲ့ စတင်ပါ။
လေ့ကျင့်ခန်းလုပ်ခြင်းနဲ့ သင့်တစ်နေ့တာကို စတင်လိုက်ပါ။ သွက်သွက်လက်လက် လမ်းလျှောက်တာ ဖြစ်ဖြစ်၊ ယောဂကျင့်တာပဲဖြစ်ဖြစ်၊ မနက်ခင်းမှာ ၁၅-၃၀ မိနစ်လောက် အချိန်ပေးပြီး လေ့ကျင့်ခန်းလုပ်တာက သင့်ခန္ဓာကိုယ်ကို အားဖြည့်ပေးပြီး တက်ကြွမှုကို ပေးနိုင်ပါတယ်။ မနက်ပိုင်း လေ့ကျင့်ခန်းလုပ်ခြင်းဟာ စိတ်ပိုင်းဆိုင်ရာ မြှင့်တင်ပေးနိုင်ပြီး တစ်နေ့တာလုံး ပိုမိုတက်ကြွစေပါတယ်။
(၂) လမ်းလျှောက်ပါ။
အားကစားခန်းမသွားစရာမလိုဘဲ သင်လုပ်ဆောင်နိုင်တဲ့ အလွယ်ကူဆုံးနဲ့ အဆင်ပြေဆုံး လှုပ်ရှားမှုများ ထဲမှ တစ်ခုမှာ လမ်းလျှောက်ခြင်းပဲ ဖြစ်ပါတယ်။ ကယ်လိုရီတွေ လောင်ကျွမ်းဖို့အတွက် သင်လုပ်ရမှာကတော့ လမ်းလျှောက်ဖို့ အချိန်ပေးခြင်းပဲ ဖြစ်ပါတယ်။ တစ်နေ့တာအတွက် သင်ရဲ့လမ်းလျှောက်နှုန်းကိုတိုင်းတာဖို့ pedometer (ခြေလှမ်းရေတွက်သောစက်) ကိုအသုံးပြုပါ။ တစ်နေ့တာမှာ ခြေလှမ်း ၁၀,၀၀၀ အထိလျှောက်ဖို့ အလေ့အကျင့်ကို ဖြည်းဖြည်းချင်း လုပ်ဆောင်ပါ။ သင်နေထိုင်ရာ ပတ်၀န်းကျင်မှာ လမ်းလျှောက်ဖို့ အခက်အခဲရှိပါက နေအိမ်အတွင်း အချိန်ပေးပြီး လမ်းလျှောက်ကြည့်ပါ။
(၃) အားလပ်ချိန်ပေးပါ။
အချိန်အကြာကြီးထိုင်ခြင်းက သင့်ကျန်းမာရေးကို ထိခိုက်စေနိုင်ပါတယ်။ တစ်နေ့တာလုံး ပုံမှန် လှုပ်ရှားမှုရှိဖို့ အားလပ်ချိန်ပေးပြီး အနားယူပါ။ နှိုးစက်တစ်ခု သတ်မှတ်ပါ ဒါမှမဟုတ် အချိန်တစ်ခုသတ်မှတ်ပြီး ကိုယ်လက်လှုပ်ရှားမှု ပြုလုပ်ပါ။ ဒီလိုအနားယူခြင်းက သွေးလည်ပတ်မှု ကောင်းမွန်စေပြီး ကြွက်သား တောင့်တင်းမှုကို သက်သာစေကာ သင့်စိတ်ကို လန်းဆန်းစေပါတယ်။
(၄) ဓာတ်လှေကားအသုံးပြုခြင်းကိုလျှော့ပါ။
ဓာတ်လှေကားအသုံးပြုခြင်းကို တတ်နိုင်သမျှ ရှောင်ကြဉ်ပါ။ လှေကားတက်ခြင်းက သင့်ခြေထောက် ကြွက်သားများအတွက် ပိုမိုကြံ့ခိုင်စေပြီး နှလုံးခုန်နှုန်းကို တိုးစေတဲ့ အကောင်းဆုံးနည်းလမ်းဖြစ်တာကြောင့် လှေကားကို ပိုပြီး အသုံးပြုပါ။ ဒီလိုပုံမှန်လုပ်ပေးခြင်းက နှလုံးသွေးကြောတွေကို ကျန်းမာကြံ့ခိုင်စေပြီး ခန္ဓာကိုယ်အောက်ပိုင်းကို သန်မာစေနိုင်ပါတယ်။
(၅) နေ့လယ်စာ အနားယူချိန်ကို အကောင်းဆုံးအသုံးချပါ။
နေ့လယ်စာစားချိန် တစ်ခုလုံးကို သင့်စားပွဲမှာ ထိုင်ဖြုန်းမယ့်အစား လှုပ်ရှားမှုတစ်ခုပြုလုပ်ပါ။ အနည်းဆုံး အပြင်ကို လမ်းလျှောက်ထွက်ပါ။ နေ့လယ်စာစားပြီး ကိုယ်လက်လှုပ်ရှားမှုပြုလုပ်ခြင်းက ကယ်လိုရီလောင်ကျွမ်း စေရုံသာမကဘဲ သင့်စိတ်ကို ပြန်လည်နုပျိုစေပြီး တစ်နေ့တာလုံးအတွက် ထုတ်လုပ်မှုစွမ်းအားကို မြှင့်တင်ပေးပါတယ်။
(၆) ဖုန်းခေါ်ဆိုနေစဉ်မှာ လှုပ်ရှားမှုလုပ်ပါ။
ဖုန်းခေါ်ဆိုမှုကို လက်ခံရရှိတဲ့အချိန်ဟာ လမ်းလျှောက်ဖို့ ဒါမှမဟုတ် လှုပ်ရှားမှုလုပ်ဖို့ အကောင်းဆုံးအချိန်ပဲ ဖြစ်ပါတယ်။ ရုံးပတ်ပတ်လည်မှာ လမ်းလျှောက်တာပဲဖြစ်ဖြစ်၊ ဖြည်းညင်းစွာ အကြောဆန့် လေ့ကျင့်ခန်းတွေ လုပ်တာပဲဖြစ်ဖြစ် လုပ်ဆောင်ပါ။ ဒီရိုးရှင်းတဲ့ အလေ့အကျင့်က သင့်ကို တက်ကြွစေပြီး ကြာရှည်ထိုင်ခြင်းမှ ရတဲ့ဆိုးကျိုးတွေကို တားဆီးပေးနိုင်ပါတယ်။
(၇) ပုံမှန်ရေသောက်ဖို့ Alarm ပေးထားပါ။
ရေဓာတ်ဟာ စွမ်းအင်ပမာဏကို ထိန်းသိမ်းဖို့နဲ့ အလုံးစုံသော ကျန်းမာရေးအတွက် အရေးကြီးပါတယ်။ တစ်နေ့တာလုံး ရေသောက်ဖို့ သင့်ဖုန်း ဒါမှမဟုတ် ကွန်ပျူတာမှာ သတိပေးချက်များ သတ်မှတ်ပါ။ အဲဒီ သတိပေးချက်က သင့်ကို ရေဓာတ်ထိန်းပေးရုံသာမက လှုပ်ရှားမှုအသေးအမွှားဖြစ်တဲ့ သင့်ရေဘူးကို ရေထဖြည့်ဖို့ လှုံ့ဆော်ပေးမှာပဲ ဖြစ်ပါတယ်။
(၈) Screen Time အတွင်း အနားယူပါ။
ယနေ့ ဒစ်ဂျစ်တယ်ခေတ်မှာ ကျွန်ုပ်တို့တွေဟာ အလုပ်အတွက်ဖြစ်ဖြစ်၊ အားလပ်ရက်မှာပဲဖြစ်ဖြစ် ဖုန်း ၊ Laptop များရှေ့မှာ အချိန်များစွာကို ကုန်ဆုံးတတ်ပါတယ်။ Screen time ရဲ့ အထိုင်များတဲ့ ဆိုးကျိုးများကို အနားယူခြင်းနဲ့ ဖယ်ရှားပါ။ မိနစ် ၃၀ မှ ၆၀ တိုင်း ခေတ္တအနားယူပါ။ သင့်ကိုယ်သင် သတိပေးဖို့ Timer ကို သတ်မှတ်ပါ။ အနားယူချိန်မှာ စားပွဲတင်လေ့ကျင့်ခန်း ဒါမှမဟုတ် အကြောဆန့်ခြင်းများကို ပြုလုပ်ပါ။ ဒါက ကြာရှည်စွာထိုင်ခြင်းရဲ့ ဆိုကျိုးကိုဖယ်ရှားပေးရုံသာမက Screen ပေါ်မှာ အလုပ် ပြန်လည်လုပ်ဆောင်ဖို့အတွက် သင့်စိတ်ကို လန်းဆန်းစေကာ အာရုံစူးစိုက်မှုကိုလည်း တိုးတက်စေမှာပဲ ဖြစ်ပါတယ်။
Manasiv Jain ရဲ့ 8 tips to stay throughout the day ကို ဆီလျော်အောင် မြန်မာဘာသာပြန်ဆို ကိုးကား ရေးသားထားပါတယ်။
Daw Thwet Shwe Yee Htun
B. Com, M.com (MEUE)
Meiktila University of Economics