"လုပ်ငန်းခွင်အတွင်း စိုးရိမ်ပူပန်မှုများကို တွန်းလှန်ခြင်း"
လုပ်ငန်းခွင်အတွင်း စိုးရိမ်ပူပန်မှုဆိုသည်မှာ အလုပ်များ လွယ်ကူမှု မရှိခြင်း၊ ခက်ခဲခြင်း၊ ကျရှုံးမှာ ကြောက်ရွံ့ခြင်းတွေကြောင့် ဖြစ်ပေါ်လာတဲ့ စိတ်မချမ်းမြေ့မှုခံစားချက်ပဲ ဖြစ်ပါတယ်။ အဲ့ဒီ ခံစားချက်တွေဟာ လူတစ်ဦးရဲ့ ကိုယ်ပိုင်ဘဝနဲ့ အသက်မွေးဝမ်းကြောင်းဘဝအပေါ် ဆိုးရွားတဲ့ အကျိုးသက်ရောက်မှုများ ရှိလာနိုင်ပါတယ်။ ၂၀၂၁ ခုနှစ်မှ ၂၀၂၂ ခုနှစ်အထိ ဗြိတိန်နိုင်ငံရှိ လူပေါင်း ၁.၈ သန်းဟာ အလုပ်နဲ့ဆက်နွှယ်တဲ့ ဖိစီးမှု၊ စိတ်ကျဝေဒနာ ဒါမှမဟုတ် စိုးရိမ်ပူပန်မှုများ ခံစားနေရကြောင်း ကျန်းမာရေးနဲ့ လုံခြုံရေး အမှုဆောင်အဖွဲ့ရဲ့ သုတေသနပြုချက်အရ တွေ့ရှိခဲ့ပါတယ်။ အလုပ်လုပ်ရတဲ့ နေ့ရက်အားလုံးရဲ့ ထက်ဝက်မှာ ဝန်ထမ်းတွေအတွက် ဒီလိုစိတ်ပိုင်းဆိုင်ရာ စိန်ခေါ်ချက်တွေ ရှိနေပါတယ်။ အသင်း အဖွဲ့ရဲ့ စွမ်းဆောင်ရည် လျော့နည်းခြင်း၊ ဝန်ထမ်းထွက်နှုန်းမြင့်မားခြင်းနဲ့ ဝန်ဆောင်မှု မကောင်းခြင်း တို့လို လုပ်ငန်းနာမည်ဆိုးထွက်ခြင်းက အလုပ်ခွင်မှာ ဝန်ထမ်းတွေရဲ့ စိုးရိမ်ပူပန်မှုနဲ့ ဆက်စပ်နေတဲ့ ပြဿနာများ ဖြစ်နိုင်ပါတယ်။
ဒီဆောင်းပါးမှာ Habit Heartbeat ကို တည်ထောင်သူ Vanessa Green (ဗန်နက်ဆာ) ရဲ့ ဝန်ထမ်းများအားလုံး ပိုမိုပျော်ရွှင်ပြီး အလုပ်လုပ်ချင်စဖွယ် လုပ်ငန်းခွင်တစ်ခုဖြစ်လာအောင် ဝန်ထမ်းတွေအနေနဲ့ စိုးရိမ်ပူပန်မှုကြောင့် ဖြစ်ပေါ်လာတဲ့ စိတ်ကျန်းမာရေး အခြေအနေတွေကို ဘယ်လိုတွန်းလှန်ရမလဲဆိုတာ မျှဝေသွားမှာ ဖြစ်ပါတယ်။ စိုးရိမ်ပူပန်မှုများကို အစပျိုးစေတဲ့ အကြောင်းရင်း (၄)ခုကတော့ အလုပ်နဲ့ လူမှုဘဝ ဟန်ချက်မညီခြင်း၊ ဆက်သွယ်မှု ညံ့ဖျင်းခြင်း၊ အလွန်အကျွံ အလုပ်ဝန်များခြင်း၊ လုပ်ဖော်ကိုင်ဖက်တွေ ဒါမှမဟုတ် အထက်လူကြီးတွေရဲ့ အနိုင်ကျင့်ခြင်း ဒါမှမဟုတ် အနှောင့်အယှက်ပေးခြင်းတို့ပဲ ဖြစ်ပါတယ်။ အဲ့ဒီအခြေအနေတွေကြောင့် အလုပ်ရှင်များဟာ သူတို့ရဲ့ဝန်ထမ်းများအတွက် မလိုအပ်တဲ့ အန္တရာယ်နဲ့ စိုးရိမ်းပူပန်မှုများ မရှိစေဖို့ ဂရုစိုက်ရမယ့် တာဝန်ရှိပါတယ်။ ပံ့ပိုးမှုပေးပြီး စိုးရိမ်ပူပန်မှု လျော့နည်း စေတဲ့ အလုပ်ခွင်ဝန်းကျင်ကို ဖန်တီးဖို့ ဗန်နက်ဆာက လက်တွေ့ကျတဲ့ အကြံပြုချက် ၁၀ ခုကို ဖော်ပြထားပါတယ်။
ပွင့်ပွင့်လင်းလင်း ပြောဆိုဆက်သွယ်ပါ။
လုပ်ဖော်ကိုင်ဖက်တွေနဲ့ အထက်လူကြီးတွေကြားမှာ ပွင့်ပွင့်လင်းလင်းနဲ့ ပြောဆိုဆက်သွယ်ပါ။ ဝန်ထမ်းတွေကို သူတို့ရဲ့ စိုးရိမ်ပူပန်မှုများ၊ အတွေးအခေါ်များနဲ့ ပြန်လည်တုံ့ပြန်မှုများကို ကြောက်ရွံ့ခြင်းမရှိဘဲ တစ်ခုဖွင့်ထားပေးပါ။
အလုပ်နဲ့ လူမှုဘဝ ဟန်ချက်ညီမှုကို မြှင့်တင်ပေးပါ။
ဝန်ထမ်းတွေကြားမှာ ကျန်းမာတဲ့၊ ကောင်းမွန်တဲ့ အလုပ်နဲ့ လူမှုဘဝ ဟန်ချက်ညီဖို့ အားပေးပါ။ အလုပ်ချိန်မဟုတ်တဲ့အချိန်တွေမှာ အလုပ်နဲ့ ဆက်နွှယ်တဲ့ အီးမေးလ်တွေ ဒါမှမဟုတ် သတင်းအချက်အလက်တွေပေးပို့တာကိုရှောင်ပြီး ဝန်ထမ်းတွေရဲ့ ကိုယ်ပိုင်အချိန်ကို လေးစားပါ။
ပြောင်းလွယ်ပြင်လွယ် အချိန်ဇယားများ စီစဉ်ပေးပါ။
ဖြစ်နိုင်ပါက ဝန်ထမ်းတွေရဲ့ တစ်ဦးချင်း လိုအပ်ချက်များကို ပံ့ပိုးပေးဖို့ ကြိုးစားပါ။ ဥပမာ - အလုပ်ကို သူတို့နေထိုင်ရာ အဝေးတစ်နေရာမှ သွားလာရခြင်းတို့လို ခရီးသွားလာရခြင်းဆိုင်ရာ စိတ်ဖိစီးမှုများကို လျှော့ချဖို့ ရုံးကိုလာစရာမလိုအပ်ဘဲ အဝေးမှ အလုပ်လုပ်စေခြင်း ဒါမှမဟုတ် ပြောင်းလွယ်ပြင်လွယ်ရှိတဲ့ အလုပ်ချိန် အစီအစဉ်များကို ကမ်းလှမ်းပါ။
လေ့ကျင့်ပေးမှုနဲ့ ဖွံ့ဖြိုးတိုးတက်မှုများ ဖန်တီးပါ။
လေ့ကျင့်မှုနဲ့ ကျွမ်းကျင်ကဲ့သို့ လူ့စွမ်းအားရင်းမြစ် ဖွံ့ဖြိုးတိုးတက်ရေး အခွင့်အလမ်းတွေမှာ ရင်းနှီး မြှုပ်နှံပါ။ ဒါက ဝန်ထမ်းတွေရဲ့ ယုံကြည်စိတ်ချမှုကို မြှင့်တင်ပေးနိုင်ပြီး ကျွမ်းကျင်မှုကွာဟ ချက်များနဲ့ ပတ်သက်ပြီး စိုးရိမ်ပူပန်မှုတွေကို လျော့နည်းစေနိုင်ပါတယ်။
စိတ်ကျန်းမာရေး အထောက်အပံ့ပေးပါ။
စိတ်ကျန်းမာရေး အသိပညာကို မြှင့်တင်ပေးပြီး လိုအပ်တဲ့ အရင်းအမြစ်တွေကို လက်လှမ်းမီ နိုင်စေဖို့နဲ့ ဝန်ထမ်းတွေကို လိုအပ်တဲ့အခါ အကူအညီရယူဖို့ တိုက်တွန်းပါ။
ကျန်းမာရေးအစီအစဉ်များလုပ်ပါ။
ယောဂသင်တန်းများ၊ သတိပဋ္ဌာန်သင်တန်းများ ဒါမှမဟုတ် ကြံ့ခိုင်ရေးသင်တန်းတွေလို ရုပ်ပိုင်းဆိုင်ရာနဲ့ စိတ်ပိုင်းဆိုင်ရာကျန်းမာရေးကို မြှင့်တင်ပေးတဲ့ ကျန်းမာရေး အစီအစဉ်တွေကို အကောင်အထည်ဖော်ဖို့ စဉ်းစားပါ။
အနားပေးပါ။
ဝန်ထမ်းတွေကို ပြန်လည်အားဖြည့်နိုင်စေဖို့ အလုပ်လုပ်နေစဉ်အတွင်း ပုံမှန်အားလပ် ချိန်များရှိအောင် ထားပေးပါ။ အလုပ်အလွန်အကျွံလုပ်ခြင်း ဒါမှမဟုတ် အားလပ်ချိန်များကို လျော့နည်းစေခြင်း စတဲ့ လုပ်ငန်းခွင် ယဉ်ကျေးမှုကို ရှောင်ကြဉ်ပါ။
အားလုံးပါဝင်မှုကို အားပေးပါ။
မတူကွဲပြားမှုကို လက်ခံဖော်ဆောင်တဲ့ အလုပ်ခွင်ယဉ်ကျေးမှု တစ်ခုကိုဖန်တီးကာ ဝန်ထမ်းများ အားလုံး တန်ဖိုးထားလေးစားခံရတယ်လို့ ခံစားရပါစေ။ ဒါက ခွဲခြားဆက်ဆံမှု ဒါမှမဟုတ် ဘက်လိုက်မှုတို့နဲ့ဆက်နွှယ်တဲ့ စိုးရိမ်ပူပန်မှုကို လျော့နည်းစေနိုင်ပါတယ်။
အချိန်စီမံခန့်ခွဲမှုလုပ်ပါ။
ထိရောက်တဲ့အချိန် စီမံခန့်ခွဲမှုစွမ်းရည်တွေကို အားပေးအားမြှောက်ပြုပြီး ဝန်ထမ်းများကို အရေးကြီး လုပ်ငန်းတာဝန်များ ဦးစားပေးလုပ်ဆောင်ဖို့နဲ့ သူတို့ရဲ့ အလုပ်တာဝန်တွေကို စီမံခန့်ခွဲရာမှာ ကျွမ်းကျင်လာအောင် လေ့ကျင့်သင်ကြားပေးမှုများ ပြုလုပ်ပေးပါ။
စိတ်ဖိစီးမှုလျော့ကျအောင် နည်းလမ်းများမျှဝေပါ။
စိတ်တည်ငြိမ်အောင်ပြုလုပ်တဲ့ လေ့ကျင့်ခန်းများ၊ အနားယူနည်းများ ဒါမှမဟုတ် စိတ်ဖိစီးမှုကို ဘယ်လိုလျှော့ချမလဲဆိုတဲ့ အလုပ်ရုံဆွေးနွေးပွဲတွေလို စိတ်ဖိစီးမှုကို စီမံခန့်ခွဲဖို့အတွက် အရင်း အမြစ်များနဲ့ နည်းစနစ်များကို မျှဝေပါ။ ဒါ့အပြင် ဗန်နက်ဆာက ဝန်ထမ်းများအနေနဲ့ လုပ်ငန်းခွင်စိုးရိမ်ပူပန်မှုများ ဖြစ်မလာအောင် ဝန်ထမ်းတွေကိုယ်တိုင် နေ့စဉ်လုပ်ဆောင်မှုတွေအတွင်း ပုံမှန်လုပ်ဆောင်လို့ရတဲ့ တခြားနည်းလမ်း တွေကို ပြောပြထားပါတယ်။
ကိုယ်ကာယကျန်းမာသန်စွမ်းအောင် ပုံမှန်လေ့ကျင့်ခန်းများ ဆောင် ရွက်ခြင်း၊ တရားထိုင်ခြင်း၊ အချိန်ကိုထိရောက်အောင်စီမံခြင်း၊ အလုပ်နဲ့ ကိုယ်ရေးကိုယ်တာကိစ္စ များကို ဟန်ချက်ညီညီ အချိန်ပေးခြင်း၊ ရည်ရွယ်ချက်ပန်းတိုင်တစ်ခု သတ်မှတ်ထားခြင်း၊ လေ့လာ သင်ယူခြင်း၊ အကူအညီ အထောက်အပံ့ပေးမယ့်သူများ ထားရှိခြင်း၊ မိမိကိုယ်တိုင် ဂရုစိုက်ခြင်း၊ ပြဿနာတွေကို အာရုံစိုက်မယ့်အစား ဖြေရှင်းချက်တွေကို ရှာဖွေနိုင်အောင် အာရုံစိုက်ခြင်း၊ ပံ့ပိုးမှု၊ အကြံဉာဏ်များနဲ့ အခွင့်အလမ်းများကို ပေးစွမ်းနိုင်တဲ့ ပရော်ဖက်ရှင်နယ် ကွန်ရက်တစ်ခုကို တည် ဆောက်ခြင်း၊ မကောင်းတဲ့အတွေးအမြင်တွေနဲ့ ယုံကြည်ချက်တွေကိုစိန်ခေါ်ဖို့ အပြုသဘော ဆောင်တဲ့၊ အကောင်းမြင်တဲ့ ကိုယ့်ကိုယ်ကိုယ် ပြောဆိုလေ့ကျင့်မှုများပြူလုပ်ခြင်း၊ အလုပ်အလွန် အကျွံလုပ်ခြင်းကို တားဆီးဖို့အတွက် ဘောင်တစ်ခုသတ်မှတ်ထားခြင်း၊ လွှဲလို့ရတဲ့ အလုပ်တာဝန် ကိစ္စတွေကို တခြားသူများအား ခွဲဝေပေးခြင်းတို့ဖြင့် မိမိတို့ရဲ့ နေ့စဉ်လုပ်ငန်းဆောင်တာများအတွင်း ပေါ်ပေါက်လာနိုင်တဲ့ စိုးရိမ်ပူပန်မှုတွေကို လျှော့ချပေးနိုင်မှာပဲ ဖြစ်ပါတယ်။ ဒီနည်းလမ်းတွေဟာ လူတိုင်းအတွက် အလုပ်မဖြစ်နိုင်ဘဲ မိမိအခြေအနေနဲ့ သင့်တော်မယ့်နည်းလမ်းတွေကို လက်တွေ့ ဆောင်ရွက်ကြည့်ရမှာပဲ ဖြစ်ပါတယ်။
Forbes မဂ္ဂဇင်းရဲ့ ဆောင်းပါးရှင် Dr Byron Cole ရေးသားတဲ့ How To Combat Anxiety At Work ဆောင်းပါးကို ဆီလျော်အောင် မြန်မာပြန်ဆိုထားပါတယ်။
U Myo Htet Naing
B.Com (Hons), M.Com (YIE)