အပြစ်တင်တဲ့အကျင့် (သို့) လူ့အဖွဲ့အစည်းရဲ့ နာတာရှည်ပြဿနာ
လူ့အဖွဲ့အစည်းတိုင်းမှာ ပြဿနာတွေရှိတတ်ပါတယ်။ ဒါပေမယ့် ပြဿနာတွေကို ဘယ်လိုဖြေရှင်းလဲဆိုတာက ပိုအရေးကြီးပါတယ်။ ဒီနေရာမှာ "အပြစ်တင်တဲ့အကျင့်" ဆိုတာကို သတိထားဖို့လိုပါတယ်။ ဒီအကျင့်ဟာ လူတွေကြားမှာ ပဋိပက္ခတွေ၊ ယုံကြည်မှုပျက်စီးမှုတွေ၊ တိုးတက်မှုနှေးကွေးမှုတွေကို ဖြစ်စေနိုင်ပါတယ်။ ဒါကြောင့် ကျွန်မတို့တွေ ဒီအကျင့်ကို နားလည်ပြီး ပြင်ဆင်ဖို့လိုပါတယ်။
အပြစ်တင်တဲ့အကျင့်ဆိုတာ ဘာလဲ
အပြစ်တင်တဲ့အကျင့်ဆိုတာက ပြဿနာတစ်ခုဖြစ်လာရင် ကိုယ်တိုင်မဟုတ်ဘဲ တစ်ခြားသူကို အပြစ်တင်တဲ့အကျင့်ပါ။ ဒီအကျင့်ဟာ လူတွေရဲ့ နေ့စဉ်ဘဝမှာ မကြာခဏကြုံရတတ်ပါတယ်။ မိသားစု၊ အလုပ်ခွင်၊ လူမှုပတ်ဝန်းကျင်တွေမှာလည်း ဖြစ်တတ်ပါတယ်။ ဥပမာအားဖြင့်၊ အလုပ်ခွင်မှာ ပရောဂျက်တစ်ခု မအောင်မြင်ရင် အကြောင်းရင်းကို ကိုယ်တိုင်ကြိုးစားမရှာဘဲ အဖွဲ့ဝင်တစ်ယောက်ကို အပြစ်တင်တာမျိုး၊ မိသားစုအတွင်း ငြင်းခုံမှုဖြစ်လာရင် ကိုယ်တိုင်မှားနေတာကို မသိဘဲ တစ်ဖက်သားကို အပြစ်တင်တာမျိုးတွေ ဖြစ်ပါတယ်။
အပြစ်တင်တဲ့အကျင့် ဘာကြောင့်ဖြစ်ရတာလဲ
ဒီအကျင့်ဖြစ်ရတဲ့ အကြောင်းရင်းတွေက
၁။ ကိုယ့်ကိုယ်ကို ယုံကြည်မှုနည်းခြင်း
ကိုယ့်ကိုယ်ကို ယုံကြည်မှုနည်းတဲ့သူတွေဟာ ပြဿနာတွေကို ရင်ဆိုင်ဖို့ကြောက်ပြီး တစ်ခြားသူကို အပြစ်တင်တတ်ပါတယ်။ ကိုယ့်ရဲ့အားနည်းချက်တွေကို ဖုံးကွယ်ဖို့ ဒီနည်းကို အသုံးပြုတတ်ကြပါတယ်။
၂။ စိတ်ဖိစီးမှုများခြင်း
စိတ်ဖိစီးမှုများတဲ့အခါ လူတွေဟာ ဆုံးဖြတ်ချက်တွေ မှန်ကန်စွာမချနိုင်တော့ဘဲ ပြဿနာတွေကို ရှောင်ဖို့ကြိုးစားတတ်ပါတယ်။ ဒီလိုအခြေအနေမှာ အပြစ်တင်တဲ့အကျင့်ဟာ သူတို့ရဲ့ စိတ်ဖိစီးမှုကို လျော့ချဖို့ နည်းလမ်းတစ်ခုလို ဖြစ်လာတတ်ပါတယ်။
၃။ လူမှုပတ်ဝန်းကျင်ရဲ့ လွှမ်းမိုးမှု
လူမှုပတ်ဝန်းကျင်မှာ တစ်ယောက်ယောက်က အပြစ်တင်တဲ့အကျင့်ရှိရင် ကျန်တဲ့သူတွေပါ ဒီအကျင့်ကို လိုက်လုပ်တတ်လာပါတယ်။ မိသားစုထဲမှာ ဖြစ်ဖြစ်၊ အလုပ်ခွင်မှာဖြစ်ဖြစ်၊ ဒီအကျင့်ဟာ ကူးစက်တတ်ပါတယ်။
အပြစ်တင်တဲ့အကျင့်ရဲ့ ဆိုးကျိုးများ
ဒီအကျင့်ဟာ လူတွေရဲ့ဘဝကို မကောင်းတဲ့သက်ရောက်မှုတွေ ဖြစ်စေနိုင်ပါတယ်။
၁။ ဆက်ဆံရေးပျက်စီးခြင်း
အပြစ်တင်တာများလာရင် လူတွေကြားက ယုံကြည်မှုတွေ ပျက်ပြီး ဆက်ဆံရေးတွေ အားနည်းလာတတ် ပါတယ်။ မိသားစုထဲမှာ ဖြစ်ဖြစ်၊ အလုပ်ခွင်မှာဖြစ်ဖြစ်၊ ဒီအကျင့်ဟာ လူတွေကြားက ဆက်ဆံရေးကို ပျက်စီးစေနိုင်ပါတယ်။
၂။ တိုးတက်မှုနှေးကွေးခြင်း
အပြစ်တင်တဲ့အကျင့်ဟာ ပြဿနာတွေကို ရှောင်ရှားစေပြီး တိုးတက်မှုကို နှေးကွေးစေပါတယ်။ အကြောင်းရင်းကို ကိုယ်တိုင်ကြိုးစားမရှာဘဲ အပြစ်တင်နေရင် ပြဿနာတွေကို ဖြေရှင်းနိုင်မှာ မဟုတ်ပါဘူး။
၃။ စိတ်ပိုင်းဆိုင်ရာ ထိခိုက်မှုများ
အပြစ်တင်တာဟာ အပြစ်တင်ခံရသူရော၊ အပြစ်တင်သူအတွက်ပါ စိတ်ဖိစီးမှုတွေ ဖြစ်စေနိုင်ပါတယ်။ အပြစ်တင်ခံရသူဟာ စိတ်ဓာတ်ကျပြီး၊ အပြစ်တင်သူကလည်း စိတ်မသက်သာဖြစ်တတ်ပါတယ်။
အပြစ်တင်တဲ့အကျင့်ကို ဘယ်လိုပြင်မလဲ
ဒီအကျင့်ကို ပြင်ဆင်ဖို့ အောက်ပါနည်းလမ်းတွေကို လိုက်နာနိုင်ပါတယ်။
၁။ ကိုယ့်ကိုယ်ကို သတိထားပါ
ပြဿနာဖြစ်လာရင် ကိုယ်တိုင်မှာ တာဝန်ရှိတဲ့အချက်တွေကို ရှာဖွေပြီး ပြင်ဆင်ပါ။
၂။ ပြဿနာကို ဖြေရှင်းဖို့ အာရုံစိုက်ပါ
အပြစ်တင်တာထက် ပြဿနာကို ဖြေရှင်းဖို့ အာရုံစိုက်ပါ။ ပြဿနာတွေကို ရင်ဆိုင်ဖြေရှင်းတဲ့အခါ ကိုယ့်ရဲ့ စွမ်းရည်တွေ တိုးတက်လာပြီး၊ ဘဝမှာ အောင်မြင်မှုတွေ ရရှိလာနိုင်ပါတယ်။
၃။ တစ်ခြားသူကို နားလည်ပေးပါ
တစ်ခြားသူကို အပြစ်တင်မယ့်အစား နားလည်ပေးဖို့ ကြိုးစားပါ။ လူတိုင်းဟာ အမှားတွေ လုပ်မိနိုင်ပြီး၊ ပြဿနာတွေကို အတူတကွ ဖြေရှင်းဖို့ လိုအပ်ပါတယ်။
၄။ အကောင်းမြင်စိတ်ထားပါ
အကောင်းမြင်စိတ်ထားတာဟာ အပြစ်တင်တဲ့အကျင့်ကို လျော့ချဖို့ အကောင်းဆုံးနည်းလမ်းပါ။ ပြဿနာတွေကို အကောင်းမြင်စိတ်နဲ့ ရင်ဆိုင်တဲ့အခါ ကိုယ့်ရဲ့ စိတ်ပိုင်းဆိုင်ရာ ကျန်းမာရေးလည်း ကောင်းမွန်လာပါတယ်။
နိဂုံး
အပြစ်တင်တဲ့အကျင့်ဟာ လူတွေရဲ့ဘဝကို ဆိုးရွားစွာ ထိခိုက်စေနိုင်ပါတယ်။ ဒါကြောင့် ဒီစိတ်ကို ကျော်လွှားဖို့ ကိုယ်တိုင်ကနေ စတင်ပြောင်းလဲဖို့ လိုပါတယ်။ ကိုယ့်ကိုယ်ကို သတိထားပြီး၊ ပြဿနာတွေကို ဖြေရှင်းဖို့ အာရုံစိုက်တာဟာ ပိုမိုကောင်းမွန်တဲ့ ဘဝတစ်ခုကို တည်ဆောက်နိုင်မယ့် နည်းလမ်းကောင်းတစ်ခုပါပဲ။ အကောင်းမြင်စိတ်ထားပြီး၊ ကိုယ်ချင်းစာစိတ်နဲ့ နေထိုင်တတ်ဖို့ ကြိုးစားကြပါစို့။
Daw Thwe Thwe Aye
B.Com (Q), M.Com (MEUE)