အောင်မြင်တဲ့လုပ်ငန်းဖြစ်ဖို့ စွမ်းဆောင်ရည်မှန်းချက် (၅) ခု
လုပ်ငန်းတစ်ခု အောင်မြင်ဖို့ဆိုတာ နေ့စဉ်လုပ်ငန်းဆောင်တာတွေကို စနစ်တကျ လုပ်ဆောင်ရုံနဲ့ မလုံလောက်ပါဘူး။ လုပ်ငန်းရဲ့ ရှေ့ဆက်သွားမယ့် လမ်းကြောင်းကို ရှင်းရှင်းလင်းလင်း သိရှိပြီး အဲ့ဒီလမ်းကြောင်းအတိုင်း လျှောက်လှမ်းနိုင်ဖို့အတွက် စွမ်းဆောင်ရည်မှန်းချက်တွေ (Performance Objectives) က အရေးပါတဲ့ အခန်းကဏ္ဍကနေ ပါဝင်နေပါတယ်။ ဒီမှန်းချက်တွေက လုပ်ငန်းကို ဘယ်လိုတိုးတက်အောင် လုပ်ဆောင်မလဲ၊ ဘယ်နေရာတွေမှာ ပိုကောင်းအောင်လုပ်မလဲ၊ ဘယ်လိုတိုင်းတာမလဲဆိုတာတွေကို ညွှန်ပြပေးပါတယ်။ အောင်မြင်တဲ့ လုပ်ငန်းတိုင်း အာရုံစိုက်သင့်တဲ့ အဓိကစွမ်းဆောင်ရည်မှန်းချက် (၅) ခုကို ဒီဆောင်းပါးမှာ ဖော်ပြပေးသွားပါမယ်။
၁။ အရည်အသွေး (Quality)
ပထမဆုံးနဲ့ အရေးအကြီးဆုံး စွမ်းဆောင်ရည်မှန်းချက်ကတော့ အရည်အသွေး (Quality) ဖြစ်ပါတယ်။ ဘယ်လုပ်ငန်းမဆို ထုတ်လုပ်နေတဲ့ ထုတ်ကုန်ပဲဖြစ်ဖြစ်၊ ဝန်ဆောင်မှုပဲဖြစ်ဖြစ်၊ အရည်အသွေးကောင်းမွန်ဖို့က အဓိကကျပါတယ်။ ဖောက်သည်တွေက အရည်အသွေးမြင့်မားတဲ့ပစ္စည်း ဒါမှမဟုတ် ဝန်ဆောင်မှုကို လိုချင်ကြပါတယ်။ အရည်အသွေးညံ့ရင် ဖောက်သည်တွေက ကိုယ့်ရဲ့လုပ်ငန်းကို စွန့်ခွာသွားနိုင်ပြီး ပြိုင်ဘက်တွေဆီကို ရောက်သွားပါလိမ့်မယ်။ ဒါကြောင့် ကိုယ့်ထုတ်ကုန် ဒါမှမဟုတ် ဝန်ဆောင်မှုရဲ့ အရည်အသွေးကို ဘယ်လိုမြှင့်တင်မလဲ၊ ပိုမိုကောင်းမွန်အောင် ဘယ်လိုလုပ်မလဲဆိုတာကို အမြဲစဉ်းစားနေရပါမယ်။ ဒါ့အပြင် အရည်အသွေးဆိုင်ရာ ချို့ယွင်းချက်တွေကို ဘယ်လိုလျှော့ချမလဲ၊ ဖောက်သည်တွေရဲ့ မကျေနပ်မှုတွေကို ဘယ်လိုကိုင်တွယ်ဖြေရှင်းမလဲ ဆိုတာတွေကလည်း အရည်အသွေးမှန်းချက်ရဲ့ အစိတ်အပိုင်းတွေ ဖြစ်ပါတယ်။ ဥပမာ- ထုတ်ကုန်တစ်ခု ထုတ်လုပ်ရာမှာ ချွတ်ယွင်းချက် ဘယ်လောက်ရာခိုင်နှုန်းရှိလဲ၊ ဝန်ဆောင်မှုပေးရာမှာ ဖောက်သည်တွေရဲ့ တိုင်ကြားမှု ဘယ်လောက်ရှိလဲ စတဲ့ အချက်အလက်တွေနဲ့ အရည်အသွေးကို တိုင်းတာနိုင်ပါတယ်။
၂။ အမြန်နှုန်း (Speed)
ခေတ်မီစီးပွားရေးလောကမှာ အမြန်နှုန်း (Speed) ဟာ အောင်မြင်မှုရဲ့ သော့ချက်တစ်ခု ဖြစ်လာပါတယ်။ ဖောက်သည်တွေက သူတို့လိုအပ်တဲ့ ပစ္စည်း ဒါမှမဟုတ် ဝန်ဆောင်မှုကို အမြန်ဆုံးရရှိဖို့ မျှော်လင့်ကြပါတယ်။ ဒါကြောင့် ကိုယ့်လုပ်ငန်းရဲ့ လုပ်ငန်းစဉ်တွေ ဘယ်လောက်မြန်သလဲ၊ ဖောက်သည်တွေရဲ့ လိုအပ်ချက်တွေကို ဘယ်လောက်မြန်မြန် တုံ့ပြန်နိုင်သလဲဆိုတာက အရေးကြီးပါတယ်။ ဥပမာ- အွန်လိုင်းအော်ဒါတွေကို ဘယ်လောက်ကြာကြာ ပို့ဆောင်ပေးနိုင်လဲ၊ ဖောက်သည်ရဲ့ မေးခွန်းတွေကို ဘယ်လောက်မြန်မြန် ပြန်ဖြေပေးနိုင်လဲ စတဲ့ အချက်တွေက အမြန်နှုန်းကို ပြသပါတယ်။ အမြန်နှုန်းကို တိုးမြှင့်နိုင်ခြင်းအားဖြင့် ဖောက်သည်ကျေနပ်မှုကို မြှင့်တင်နိုင်သလို လုပ်ငန်းရဲ့ ယှဉ်ပြိုင်နိုင်စွမ်းကိုလည်း တိုးတက်စေပါတယ်။ တစ်ချိန်တည်းမှာပဲ အမြန်နှုန်းမြှင့်တင်ရင်း အရည်အသွေးမကျဆင်းအောင် ထိန်းသိမ်းဖို့လည်း လိုအပ်ပြန်ပါတယ်။
၃။ ယုံကြည်စိတ်ချရမှု/မှီခိုနိုင်စွမ်း (Dependability)
ယုံကြည်စိတ်ချရမှု/မှီခိုနိုင်စွမ်း (Dependability) ဆိုတာ ကိုယ့်လုပ်ငန်းက ပေးထားတဲ့ ကတိအတိုင်း လိုက်နာနိုင်ခြင်း၊ ဖောက်သည်တွေရဲ့ မျှော်လင့်ချက်တွေကို ပြည့်မီအောင် လုပ်ဆောင်နိုင်ခြင်းကို ဆိုလိုပါတယ်။ သတ်မှတ်ထားတဲ့ အချိန်၊ သတ်မှတ်ထားတဲ့ အရည်အသွေးနဲ့ သတ်မှတ်ထားတဲ့ ပမာဏအတိုင်း ပေးနိုင်တာဟာ ယုံကြည်စိတ်ချရမှုရဲ့ အဓိပ္ပာယ်ပါပဲ။ ဖောက်သည်တွေဟာ သူတို့စိတ်ချယုံကြည်နိုင်တဲ့ လုပ်ငန်းနဲ့ပဲ ပူးပေါင်းချင်ကြပါတယ်။ သတ်မှတ်ထားတဲ့ ပစ္စည်းပို့မယ့်ရက် ဒါမှမဟုတ် ဝန်ဆောင်မှုပေးမယ့်ရက်အတိုင်း မပျက်မကွက် လုပ်ဆောင်နိုင်ခြင်း၊ ဖောက်သည်ရဲ့ လိုအပ်ချက်တွေကို လွဲချော်မှုမရှိဘဲ ဖြည့်ဆည်းပေးနိုင်ခြင်း စတာတွေက ကိုယ့်လုပ်ငန်းရဲ့ ယုံကြည်စိတ်ချရမှု ဘယ်လောက်ရှိလဲဆိုတာကို ပြသပါတယ်။ ယုံကြည်စိတ်ချရမှု ကင်းမဲ့တဲ့ လုပ်ငန်းတွေဟာ ရေရှည်မှာ ရပ်တည်ဖို့ ခက်ခဲပါလိမ့်မယ်။
၄။ ပြောင်းလဲနိုင်စွမ်း (Flexibility)
ယနေ့ခေတ် စီးပွားရေးပတ်ဝန်းကျင်ဟာ အမြဲတမ်း ပြောင်းလဲနေပါတယ်။ ဒါကြောင့် လုပ်ငန်းတစ်ခုအနေနဲ့ ပြောင်းလဲနိုင်စွမ်း (Flexibility) ရှိဖို့က အရေးကြီးပါတယ်။ စျေးကွက်ရဲ့ လိုအပ်ချက်တွေ၊ ဖောက်သည်တွေရဲ့ ပြောင်းလဲနေတဲ့ အကြိုက်တွေ၊ နည်းပညာအသစ်တွေ စတာတွေကို လိုက်လျောညီထွေဖြစ်အောင် လိုက်လျောညီထွေဖြစ်အောင် လိုက်လျောညီထွေဖြစ်အောင် လုပ်ဆောင်နိုင် ရပါမယ်။ ဒါမှသာ ကိုယ့်လုပ်ငန်းဟာ ခေတ်နောက်ကျမကျန်ဘဲ ဆက်လက်ရှင်သန်နိုင်မှာပါ။ ပြောင်းလဲနိုင်စွမ်းဆိုတာ ထုတ်ကုန်အသစ်တွေ အမြန်ထုတ်လုပ်နိုင်ခြင်း၊ ဝန်ဆောင်မှုပုံစံ အသစ်တွေ အလွယ်တကူ ပြောင်းလဲနိုင်ခြင်း၊ ထုတ်လုပ်မှု ပမာဏကို လိုအပ်သလို အတိုးအလျှော့ လုပ်နိုင်ခြင်း စတာတွေကို ဆိုလိုပါတယ်။ ပြောင်းလဲနိုင်စွမ်း နည်းပါးတဲ့ လုပ်ငန်းတွေဟာ ပြောင်းလဲလာတဲ့ အခြေအနေတွေကို မလိုက်လျောနိုင်ဘဲ နောက်ကျကျန်ရစ်ခဲ့တတ်ပါတယ်။
၅။ ကုန်ကျစရိတ် (Cost)
နောက်ဆုံး စွမ်းဆောင်ရည်မှန်းချက်ကတော့ ကုန်ကျစရိတ် (Cost) ပါပဲ။ လုပ်ငန်းတိုင်းဟာ ကုန်ကျစရိတ်ကို ထိန်းချုပ်ပြီး အမြတ်အစွန်းရရှိဖို့ ကြိုးစားကြပါတယ်။ ကုန်ကျစရိတ်ကို လျှော့ချနိုင်ခြင်းအားဖြင့် ထုတ်ကုန် ဒါမှမဟုတ် ဝန်ဆောင်မှုတွေကို စျေးသက်သာစွာနဲ့ ပေးနိုင်ပြီး ယှဉ်ပြိုင်နိုင်စွမ်းကို မြှင့်တင်နိုင်ပါတယ်။ ဒါပေမယ့် ကုန်ကျစရိတ်ကို လျှော့ချရာမှာ အရည်အသွေး ဒါမှမဟုတ် တခြားအရေးကြီးတဲ့ အချက်တွေကို ထိခိုက်မှုမရှိအောင် ဂရုစိုက်ရပါမယ်။ ကုန်ကျစရိတ်ကို ထိထိရောက်ရောက် စီမံခန့်ခွဲနိုင်ဖို့အတွက် ထုတ်လုပ်မှုကုန်ကျစရိတ်၊ လုပ်ငန်းလည်ပတ်မှုကုန်ကျစရိတ်၊ ဝန်ထမ်းခ စတဲ့ ကုန်ကျစရိတ်အမျိုးမျိုးကို ခွဲခြမ်းစိတ်ဖြာပြီး ဘယ်နေရာမှာ လျှော့ချနိုင်မလဲဆိုတာကို ရှာဖွေရပါမယ်။ ဥပမာ- ထုတ်လုပ်မှု လုပ်ငန်းစဉ်တွေကို ပိုမိုထိရောက်အောင် လုပ်ဆောင်ခြင်း၊ စွမ်းအင်ချွေတာခြင်း၊ မလိုအပ်တဲ့ စရိတ်တွေကို လျှော့ချခြင်း စတာတွေက ကုန်ကျစရိတ်ကို လျှော့ချနိုင်တဲ့ နည်းလမ်းတွေ ဖြစ်ပါတယ်။
အောင်မြင်တဲ့ လုပ်ငန်းတစ်ခု ဖြစ်လာဖို့အတွက် ဒီဖော်ပြခဲ့တဲ့ လုပ်ငန်း လည်ပတ်မှုဆိုင်ရာ စွမ်းဆောင်ရည်မှန်းချက် (၅) ခုဖြစ်တဲ့ အရည်အသွေး (Quality)၊ အမြန်နှုန်း (Speed)၊ ယုံကြည်စိတ်ချရမှု/မှီခိုနိုင်စွမ်း (Dependability)၊ ပြောင်းလဲနိုင်စွမ်း (Flexibility) နဲ့ ကုန်ကျစရိတ် (Cost) တို့ကို အာရုံစိုက်ပြီး လုပ်ဆောင်ဖို့ လိုအပ်ပါတယ်။ ဒီမှန်းချက်တွေဟာ တစ်ခုနဲ့တစ်ခု ဆက်စပ်နေပြီး တစ်ခုချင်းစီကို သီးခြားကြည့်လို့ မရပါဘူး။ ဥပမာ- ကုန်ကျစရိတ် လျှော့ချရင်း အရည်အသွေး ကျဆင်းသွားရင်၊ အမြန်နှုန်းကို မြှင့်တင်ရင်း မှီခိုနိုင်စွမ်း နည်းသွားရင် လုပ်ငန်းအတွက် ရေရှည်မှာ မကောင်းပါဘူး။ ဒါကြောင့် ဒီမှန်းချက်တွေကို ဟန်ချက်ညီညီ ပေါင်းစပ်ပြီး အကောင်အထည်ဖော်ခြင်းဖြင့် လုပ်ငန်းကို ရေရှည် တည်တံ့အောင်မြင်စေနိုင်မှာ ဖြစ်ပါတယ်။ ကိုယ့်လုပ်ငန်းရဲ့ အောင်မြင်မှုအတွက် ဒီရည်မှန်းချက်တွေကို ဘယ်လို အသုံးချသွားမလဲဆိုတာ စဉ်းစားကြည့်ဖို့ အချိန်တန်ပါပြီ။ နောက်ဆက်ပြီးတော့ ထိရောက်တဲ့ စွမ်းဆောင်ရည်မှန်းချက်တွေ ဘယ်လိုသတ်မှတ်ရမလဲဆိုတာ ဆက်လက်ရေးသားသွားပါဦးမယ်။
Joseph Garvey ရေးသားသော 5 Key Performance Objectives Every Business Should Focus On ဆောင်းပါးကို ဆီလျော်အောင် မြန်မာပြန်ဆိုသည်။
Link: https://www.peoplegoal.com/blog/what-are-the-five-performance-objectives