အလုပ်ခွင်မှာ ဝန်ထမ်းများရဲ့  စိတ်ကျေနပ်မှုနဲ့ ဆက်ဆံရေးမြှင့်တင်ဖို့အတွက် သော့ချက်များ

လတ်တလော တစ်ကမ္ဘာလုံးဆိုင်ရာ စစ်တမ်းများအရ ဝန်ထမ်းများ အလုပ်ခွင်မှာ စိတ်ကျေနပ်မှုမရှိခြင်းများ၊ အလုပ်ရှင် (ဒါမှမဟုတ်) လုပ်ဖော်ကိုင်ဖက်များနဲ့ ကောင်းမွန်တဲ့ ဆက်ဆံရေးမရှိခြင်းများကို လေ့လာတွေ့ရှိ ရပါတယ်။ ထိအချက်များဟာ ဝန်ထမ်းများ အလုပ်မှ “နုတ်ထွက်ခြင်း” ကိုဖြစ်စေတဲ့ အဓိကအကြောင်းအရင်းများ ဖြစ်ပါတယ်။ ဒါ့အပြင် အလုပ်ရှင်အများစုက ဝန်ထမ်းများထက် လုပ်ငန်းရည်ရွယ်ချက်ကို အချိန်တိုအတွင်း ဘယ်လိုရအောင်ယူရမလဲ၊ ထုတ်ကုန်များကို အရောင်းသွက်အောင် ဘယ်လိုလုပ်ဆောင်ရမလဲ စတဲ့ အရာများ ပေါ်မှာသာ အာရုံစိုက်လာကြတာတွေ့ရပါတယ်။  ဒါကြောင့် လက်ရှိအချိန်မှာ covid ကာလ မတိုင်ခင်ကထက်  အလုပ်ထွက်နှုန်းများ ပိုများလာတာကို စစ်တမ်းများအရ တွေ့ရနိုင်ပြီး အဲ့ဒီအရာဟာ လုပ်ငန်းကြီးများအတွက် စိန်ခေါ်မှုတစ်ခု ဖြစ်လာပါတယ်။

ဝန်ထမ်းများဟာ သူတို့ရဲ့သဘာထားအမြင်များ၊ ကောင်းမွန်တဲ့ လုပ်ဆောင်မှုတွေအပေါ်မှာ တန်ဖိုးထား အလေးပေးတဲ့ အဖွဲ့အစည်းများမှာသာ သူတို့ရဲ့ အချိန်အများစုကို ရင်းနှီးမြှုပ်နှံချင်ကြပါတယ်။ သူတို့ရဲ့ အချိန်များ ရင်းနှီးမြှပ်နှံပြီး လုပ်ငန်းနဲ့ ရေရှည်လက်တွဲလုပ်ဆောင်ပါက လုပ်ငန်းရှင်နဲ့ ဝန်ထမ်းနှစ်ဖက်လုံးအတွက် ကောင်းတဲ့ အကျိုးသက်ရောက်မှု ရှိမှာဖြစ်ပါတယ်။ လုပ်ငန်းရှင်များအနေနဲ့ ခိုင်မာတဲ့ အဖွဲ့အစည်းတစ်ခုအဖြစ် ရပ်တည်ဖို့ နည်းလမ်းများ ရှာဖွေရာမှာ အဲ့ဒီအဖွဲ့အစည်းကို ပံ့ပိုးကူညီပေးမယ့် အတွေးအခေါ်အမြော်အမြင်ရှိတဲ့ ဝန်ထမ်းများကိုလည်း ဂရုပြုဖို့ လိုအပ်ပါတယ်။

၁။ အဖွဲ့အစည်းအတွင်းမှာ ဝန်ထမ်းများအတွက် ကောင်းမွန်တဲ့ဆက်သွယ်ရေး ဖန်တီးပါ။

လုပ်ငန်းရဲ့ အဓိကတန်ဖိုးများထဲမှတစ်ခုမှာ ပွင့်လင်းမြင်သာမှုဖြစ်ပါတယ်။ လုပ်ငန်းမှ ချမှတ်ထားတဲ့ ရည်ရွယ်ချက်များ၊ နည်းဗျူဟာများနဲ့ ဆုံးဖြတ်ချက်များကို ဝန်ထမ်းများအား နားလည်သဘောပေါက်ဖို့မှာ အရေးကြီးတဲ့ အချက်တစ်ချက်ဖြစ်ပါတယ်။ ဝန်ထမ်းများအနေနဲ့ လုပ်ငန်းဘာအတွက်ကြောင့် လည်ပတ် နေရသလဲ၊ ဘယ်ကိုဦးတည်နေသလဲသိမှသာ လုပ်ငန်းအတွက် လိုအပ်တဲ့နေရာမှ ပံ့ပိုးကူညီနိုင်မှာဖြစ်ပါတယ်။ ဥပမာ ဝန်ထမ်းများအတွက် စနစ်ကကျ သတ်မှတ်ထားတဲ့ meeting  များ၊ တွေ့ဆုံပွဲများမှာ ဝန်ထမ်းများရဲ့ အခက်အခဲများကို မေးမြန်းခြင်း (ဒါမှမဟုတ်) ဝန်ထမ်းများသိလိုတဲ့ အကြောင်းအရာတွေကို ဆွေးနွေးခြင်းဖြင့်  အလုပ်ရှင်နဲ့ ဝန်ထမ်းကြားမှာ ဆက်ဆံရေး ကောင်းမွန်လာစေနိုင်ပါတယ်။

၂။ ကုန်အမှတ်တံဆိပ်ရဲ့  image ကို ဝန်ထမ်းများနဲ့ မြှင့်တင်ပါ။

ကုန်အမှတ်တံဆိပ်တစ်ခုရဲ့ image ဟာ ထိုလုပ်ငန်းအတွင်းပိုင်းကို ထင်ဟပ်စေပါတယ်။ ဥပမာ- product quality ကောင်းပြီး side effect မရှိပါက ဝယ်သူတွေအပေါ်မှာ အကျိုးသက်ရောက်မှု ကောင်းမွန်မှာဖြစ်ပါတယ်။ အဲဒီလို ကောင်းမွန်တဲ့ ကုန်အမှတ်တံဆိပ်ကြောင့် ဝယ်သူများက လုပ်ငန်းအပေါ်မှာ ယုံကြည်မှုရှိမှာ ဖြစ်ပါတယ်။ ထိုယုံကြည်မှုကို ဆက်လက်ထိန်းသိမ်းထားဖို့မှာ အတွင်းပိုင်းရှိဝန်ထမ်းများရဲ့ တာဝန်ဖြစ်ပါတယ်။ ဒါကြောင့် အတွင်းပိုင်းရှိ ဝန်ထမ်းများရဲ့ ဝန်ဆောင်မှုကလည်း ကုန်အမှတ်တံဆိပ်ပေါ်မှာ သက်ရောက်မှုရှိနေပါတယ်။ ဝန်ထမ်းများဟာ လုပ်ငန်းခွင်မှာ စိတ်ကျေနပ်မှုမရှိပါက ကောင်းမွန်တဲ့ ဝန်ဆောင်မှုလည်း ပေးနိုင်မှာမဟုတ်ပါဘူး။

၃။ အမြဲသစ္စာရှိပါ။

ခိုင်မာတဲ့ အလုပ်ရှင်-ဝန်ထမ်း ဆက်ဆံရေးဟာ ယုံကြည်မှုနဲ့ တည်ဆောက်ဖို့ လိုအပ်ပါတယ်။ ထိုယုံကြည်မှုကို ဖျက်စီးဖို့ အမြန်ဆုံးနည်းလမ်းမှာ ဝန်ထမ်းတွေကို လိမ်ညာခြင်းပဲ ဖြစ်ပါတယ်။ လုပ်ငန်းအတွင်း တချို့အဖြစ် အပျက်များနဲ့ ပတ်သက်တဲ့ အသေးစိတ်အချက်များအားလုံးကို မျှဝေဖို့ အမြဲတမ်း မဖြစ်နိုင်ပေမယ့်လည်း၊ လိမ်ညာခြင်းထက် ပွင့်ပွင့်လင်းလင်းပြောဆိုခြင်းက အလုပ်ရှင်နဲ့ ဝန်ထမ်းကြား ကောင်းမွန်တဲ့ဆက်ဆံရေးကို ဖန်တီးနိုင်မှာဖြစ်ပါတယ်။

၄။ စီမံခန့်ခွဲမှုအဆင့်အားလုံးကို သေချာသတ်မှတ်ပါ။

လုပ်ငန်းရဲ့ တရားဝင်ကြေညာချက်များကို အင်ထရာနက်ပို့စ်များ၊ Slack မက်ဆေ့ချ်များ ဒါမှမဟုတ် HR မှ အီးမေးလ်များ စတာတွေကိုအသုံးပြုပြီး ဝန်ထမ်းတွေကို ဆက်သွယ်ဖို့ လိုအပ်ပါတယ်။ လုပ်ငန်းခွင်မှာ သက်မှတ်ထားတဲ့ ရာထူးအလိုက် လက်အောက်ငယ်သား (ဒါမှမဟုတ်) အချင်းချင်းကြားမှာ ဆက်သွယ်မယ့်ပုံစံကို စနစ်တကျ သတ်မှတ်ထားဖို့ လိုအပ်ပါတယ်။ ဒါကြောင့် ဝန်ထမ်းများနဲ့ သူတို့ရဲ့ အထက်အရာရှိများကြားမှာ ဆက်ဆံရေးပိုမိုကောင်းမွန်အောင် တည်ဆောက်ထားဖို့ လိုအပ်ပါတယ်။ အဲဒီလိုမဟုတ်ပါက သတင်းအချက် အလက်များ ပြတ်တောက်ခြင်း (သို့) နားလည်မှုလွဲခြင်း စတဲ့အခြေအနေများ ဖြစ်ပေါ်ကာ အလုပ်ခွင်မှာ အမှားများစွာ ဖြစ်ပေါ်လာနိုင်ပါတယ်။

5. ဝန်ထမ်းများရဲ့ စိတ်ကျေနပ်မှုနဲ့ ဆက်ဆံရေး တိုးတက်မှု ရှိ၊မရှိ တိုင်းတာပါ။

လုပ်ငန်းခွင်မှာ ဝန်ထမ်းများရဲ့ အခြေအနေများကို တက်ကြွစွာ နားထောင်ပြီး Feedback များ ပြန်လည် ပေးခြင်းက စိတ်အားတက်ကြွမှုကို ဖြစ်စေပါတယ်။ အထက်လူကြီးမှ တစ်လတစ်ကြိမ် (ဒါမှမဟုတ်) သုံးလ တစ်ကြိမ် ဝန်ထမ်းများရဲ့ အလုပ်ခွင်မှာ လုပ်ဆောင်မှုအခြေအနေကို လေ့လာသုံးသပ်ဖို့ လိုအပ်ပါတယ်။ ဒါ့အပြင် ဝန်ထမ်းများ အလုပ်ခွင်မှာ စိတ်ကျေနပ်မှုရှိစေဖို့နဲ့ အချင်းချင်းကြား ဆက်ဆံရေးများ ပိုမိုကောင်းမွန်လာစေဖို့ အလုပ်ရှင်နဲ့ သူတို့ရဲ့အထက်လူကြီးများက ဘက်လိုက်မှုမရှိဖို့ကလည်း အရေးကြီးတဲ့အချက် တစ်ချက် ဖြစ်ပါတယ်။  အလုပ်ခွင်မှာ ဘက်လိုက်မှုများ၊ ကိုယ်ရေးကိုယ်တာ ကိစ္စများကြောင့် ဦးစားပေးခြင်း များဟာ လက်တွေ့မှာ ဝန်ထမ်းများ စိတ်မကျေနပ်မှုများ ဖြစ်စေကာ ဆက်ဆံရေးများ ယိုးယွင်းလာနိုင်မှာပဲ ဖြစ်ပါတယ်။ ခိုင်မာတဲ့ အဖွဲ့အစည်းတစ်ခုဖြစ်စေဖို့ အလုပ်ရှင်နဲ့ ဝန်ထမ်းများကြား ကောင်းမွန်တဲ့ ဆက်ဆံရေး တည်ဆောက်ဖို့ လိုအပ်ပါတယ်။

Jean Serra ရဲ့ The Key to Improving Employee Satisfaction and Engagement ကို ဆီလျော်အောင် မြန်မာဘာသာ ပြန်ဆိုကိုးကား ရေးသားထားပါတယ်။

 

Daw Thwet Shwe Yee Htun

B. Com, M.com (MEUE)

Meiktila University of Economics